Karê HDP'ê yê ji bo hilbijartinên 24'ê Hezîranê bi xurtî dewam dikin. Di vê çarçoveyê de serdana gel, esnaf û malan tê kirin, buroyên hilbijartinê tên vekirin û belavok tên belavkirin. Yek ji bajarên ku karekî berfireh lê tê kirin Sêrt e. HDP'yî bi coşa gel li nava kolan û malan digerin.

Parlamentera Wanê Bedîa Ozgokçe Ertan û endama Meclîsa Partiyê ya HDP'ê Hurriyet Kaytar jî tevlî serdana esnafan bûn. Hurriyet Kaytan li ser karê xwe yê Sêrtê agahî da.

Kaytar işaret bi eleqeya gel a ji bo HDP û namzetê wan ê Serokkomariyê Selahattîn Demîrtaş kir û got, "Eleqeya gelê me li gorî hilbijartinên 1'ê Mijdarê gelekî zêdetir e."

Kaytar bal kişand ser hêrsa li dijî tifaqa paşverû ya AKP-MHP'ê û got, "Bi dîtina min, gelê Sêrtê wateya tifaqa AKP-MHP'ê fêhm kiriye. Dema ku mijar dijberiya li daxwazên gelê Kurd be, yên hevrikê hev in jî dibin yek. Gelê me vê yekê dibîne û yekîtiya neteweyî û tifaqa gelên bindest weke yekane rêya çareseriyê dibîne."

Kaytar li ser têkiliya navbera gelên Kurd û Ereb ên li Sêrtê jî diyar kir ku sîstemê dîwar di navbera gelan de lê kiriye û got, "Lê belê ev dîwar dikare bê hilweşandin."

Der barê cudahiya navbera hilbijartinên 24'ê Hezîranê û 7'ê Hezîrana 2015'an de Kaytar got, "Qedandina pêvajoya çareseriyê, komkujiyên bi desteka sîstemê hatin kirin û dagirkirina Efrînê ya vê dawiyê, di nava gelê Kurd de rê li ber hişmendiyeke neteweyî vekiriye. Bêguman ev hişmendî wê bandorê li hilbijartinê bike. Bi vî hiş û têgihiştinê wê di 24'ê Hezîranê de dengdan were kirin."