Malbatên Roboskiyan ên ku 34 zarokên wan ên ku di encama bomberdûmana balafirên şer ên artêşa Tirk ên li gundê Roboskî yê navçeya Qilaban a Şirnexê de hatibûn qetilkirin, di hefteya 299’an a lêgerîna xwe ya edaletê de, çûn ser gorên kesûkarên xwe. Malbatan pankarat wêneyên kesûkarên wan ên hatibûn qetilkirin û nivîsa “Ji bo Roboskiyê edalet, ji bo edaletê, berpirs bila bên darezandin” hebû vekirin û li ser navê malbatan Velî Encû daxuyanî da.

‘HETA KU BERPIRS BÊN DAREZANDIN…’

Encû destnîşan kir ku ev 2 hezar û 93 roj in li benda edaletê ne, sozên ji bo wan hatine dayîn nehatine pêkanîn û got: “Roboskî ya ku zilim lê hate kirin, wê weke şerma dewletê di nava dîrokê de her bimîne.” Encû bal kişand ku dixwazin dozê bi demê re bidin jibîrkirin û got: “Li Roboskiyê, di nava bêedaletiyekê de ku ji nifşan belavî nifşan dibe, dijî û ji bo edaletê tev digere. Têkoşîna me heta ku berpirs diyar bibin û bên darezandin wê bidome.”

JI BO ROBOSKIYÊ BANG

Encû bibîr xist ku dev jî lêgerîna edaletê bernedane û bang li herkesê ku xwedî wijdan kir ku çalakiya lêgerîna edaletê ya hefteya 300’an kir ku berê xwe bide Roboskiyê û wiha anî ziman: “Em bang li her kesê dikin bi me re bibe yek. Em ê bi teqez serweriya zaliman hilweşînin. Wê ev zilim, ev bêedaletî wan tine bike û me jî hê bi biryartir bike.”