Çeteyên DAÎŞ'ê duh danê êvarê êrîş birin ser gundên Avaya Mensûr û Dara yên herêma Heftexar ên navçeya Daqoq a li başûrê Kerkûkê. Çeteyên DAÎŞ'ê ku gundên Avaye Ferix û Avaya yên navçeya Daqoqê beriya niha dagir kiribûn, gundê Avaya Mensur jî dagir kirin.

Çavkaniyên xwecihî gotin, çeteyên DAÎŞ'ê piştî ku gund dagir kirin, li benda kontrolê û navenda ku Polîsên Federal ên Iraqê bi kar dianîn bi cih bûn, benda kontrolê danîn û deketina ji gund li gundiyan qedexe kirin.

Çeteyên DAÎŞ'ê piştî ku gundê Avaya Mensur dagir kirin, berê xwe dan gundê Dara, di demeke kin de ketin nava gund, lê belê hê gund bi temamî kontrol nekirine. Gundê Dara ku di navbera Daqoq û Xurmatû ye, tenê bi kîlometreyekê dûrî rêya Kerkûk-Bexdayê ye. Dagirkirina gundê Dara dibe ku bibe sedem rêya navbera Kerkûk-Bexda, Kerkûk-Tîkrît bê girtin.