Egîd Baran sala 2001'ê li Amedê ji dayik bû. Kurê malbateke newelatparêz a Farqînî bû. Zext û nêzîkatiyên malbata wî tehde lê dikir. Li bajarên Antalya û Manîsa yên Tirkiyeyê ma; nêzîkatiya li dijî Kurdan hîn bi eşkere dît. Ji ber ku Kurd bû zilm lê dihate kirin. Her ku zilm giran dibû wî jî bêhtir li rewşê dipirsî. Qebûl nekir. Hîn ji zarokatiyê ve bala wî li ser PKK'ê bû. Piştî ku mezin bû ev baldarî veguherî hezkirinê.

Li gorî vê yekê ji xwe re heval jî peyda kir; çalakî, xwepêşandan şopand. Fermandar Egîd hîn dibû. Dixwest ku mîna wî îtiraz bike, serî hilde, xizmetê ji gelê xwe re bike. Êdî nikarîbû zext û zilmê qebûl bike. Di dawiya dawî dema ku xwe amade dît, gaveke bi şeref avêt û tevlî nava refên gerîla bû.

KES NIKARE BI ZORÊ TEVLÎ BIBE

Gerîla Egîd wiha dewam dike: "Wijdanê me, şerefa me xwe li vê rewşê ranegirt, bi zanebûn û bi dilê xwe tevlî bûm. Bi dayikên li pêşiya avahiya HDP'ê dane rûniştandin bi zorê gotina 'PKK'ê zarokên me bi zorê revand' didin gotin. Ji ber ku me êdî nekarîbû xwe li vê zilmê rabigirin em li vir in. Em bi daxwaza xwe tevlî bûn û malbata me jî baş bi vê zane. Beriya tevlî bibim min ji malbata xwe re nameyek jî nivîsand, bi wan re jî axivîm û ji wan re got ku ez bi daxwaza xwe tevlî bûme. Tevî vê yekê jî ketine nava xefika dijmin, li pêşiya avahiya HDP'ê ya bajêr dibêje 'PKK zarokên me direvîne'. Ew jî zanin ku ev ne rast e. Dijmin polîtîkaya şerê taybet dimeşîne. Bi taybetî li dijî malbatên gerîla û şehîdan. Kes nikare bi zorê tevlî nava refên gerîla bibe. Lê tiştekî wiha ye; yê ku bi zorê leşkeriyê dide kirin dewleta Tirk e. Yê ku bi zorê dide şerkirin dewleta Tirk e. Me ev yek qebûl nekir."

'DIVÊ MALBATÊN ME NEKEVIN XEFIKÊ'

Egîd bi bîr xist ku HDP di siyaseta Tirkiyeyê de partiyeke girîng a siyasî ye, ew jî li çiyayên Kurdistanê hêzên gerîla ne û got, "Bila malbatên me nekevin xefika AKP, MHP û Erdogan ê faşîst, bila nebin pêlîstokên wan ên şerê taybet, bila xwe vekişînin. Li şûna ku vê bikin bila biçin pêşiya avahiya AKP'ê ya bajêr û ji bo aştiyê rûnên. Di serî de malbata min ez bang li malbatên li wir rûniştine hemûyan dikim; vekişin, nekevin xefika Erdogan. Bi karên sîxurkirinê yên li nava civakê tên meşandin nexapin, nehêlin ku we bikin sîxur, li ber rabin."