Balafirên şer ên Tirk duh bi şev saet di 02:30 de careke din bombe li çiyayê Asosê barandin, ku li bajarê Silêmanî ye û di navbera Rojhilat û Başûrê Kurdistanê de ye.

Li gorî agahiyên ku gundiyên li herêma Asosê dan, balafirên şer ên Tirk duh bi şev saet di 02:30 de careke din bombe li herêmê barandin. Balafirên şer ên Tirk 5 bombe avêtin çiyayê Asosê.

Artêşa Tirk duh danê nîvro jî bombe li çiyayê Asosê barandibûn.

ÊRÎŞA HEVPAR A TIRKIYE-ÎRANÊ

Êrîşên bi balafirên şer ên li dijî çiyayê Asosê, ji meha Mijdarê û vir ve dewam dikin. Çavkaniyên herêmî dibêjin, beriya êrîşa bi balafirên şer, balafirên keşfê yên Îranê li ser herêmê geriyane.

Dewletên Tirk û Îranê ku li dijî Kurdan bi hev re tevdigerin, dema dawî gelek caran li hev rûniştin. Êrîşên li dijî Asosê, weke êrîşa hevpar a her du dewletan tê dîtin.

Hevseroka Partiya Jiyana Azad a Kurdistanê (PJAK) Zîlan Vejîn çend roj berê ji ANF'ê re axivî bû û gotibû, "Îran li dijî Kurdan ketiye nava tifaqeke qirêj."

Yekîneyên Rojhilatê Kurdistanê (YRK) jî 2'ê Mijdarê bi daxuyaniyekê ragihandibû ku di bomberdûmanê de 3 gerîlayên wan şehîd bûne.