Li bajarê Sine ya xwînavî cotek çavên kesk ji cîhanê re vebûn. Çavên kesk û rûyê xweşik ê zaroka mîna kulîlka nîlûfer bûn, lewma navê wê kirin Nîlûfer Xalidiyan. Nîlûfer di malbateke welatparêz de mezin bû û her ku mezin bû rû bi rûyê dagirkeriyê hat, di heman demê de çand û exlaqê gelê Rojhilat nas kir. Pergala rêveberiyê ya Îranê çiqasê bixwaze gelê Kurd di çanda Farisî de bihelîne, lê gelê Rojhilat wê bi parastina çand û exlaqê Kurdî zarokên xwe perwerde bike, wan fêrî çanda biyanî neke û weke parêzvanên Kurd bimîne. Nîlûfer bi vê çandê her tim di Kurdbûna xwe de israr kir û ti carî destûr neda ku dagirker destê xwe dirêjî çanda wê ya hundirîn bike û wê tune bike.

Nîlûfer ji bo ku bibe parêzvana hertimî ya ax û azadiya welat û gelê xwe, di sala 2017'an de ji bo şopandina rêya Bêrîtanan û xwîna bajarê xwe yê xwînavî li erdê nehêle, tevlî nava refên gerîla bû. Bêrîtan çand û karakterê Partiya Karkerên Kurdistanê (PKK) li Qendîlê baştir nas dike û ji bo azadiya Rêber Apo, gel û axa xwe soz dide ku bi hemû ruh û giyana xwe ji bo şoreşa azadiyê feda bike. Asta fedakariya hevaltiya PKK'ê bandorek mezin li ser kesayeta Bêrîtan kir. Bêrîtan zanibû, ku yek ji stûnên PKK'ê hevaltî ye; ji bo vê jî bi dil û can tevlî vê hevaltiyê bû û ji hevalên xwe re bû hevalekî dilovan û fedakar.

XWE SPART HEVALÊN XWE Û ÇIYAYÊN KURDISTANÊ

Di sala 2018’an de Bêrîtan berê xwe da çiyayên Zagros û Qada Zapê. Bedewiya xwezayê û çiyayên bilind ên Zagrosan hîseke taybet di hundirê wê de ava dike. Bêrîtan zanibû ku çiya gerîlayan diparêze û gerîla jî çiyayên Kurdistanê ji êrîşên dagirkeran diparêze. Gerîla bê çiya û çiya bê gerîlla nabe. Ji bo vê jî Bêrîtan bû parêzvana çiyayên bedew ên Zagrosê û li wan xwedî derket. Li hemberî êrîşên dagirkeran ên li ser çiyayên Kurdistanê, mîna keleha pola li ber xwe da û nehişt ku dagirker çiyayên azad ên Kurdistanê dagir bikin. Li hevaltiya hevrêyên xwe mîna çiyayekî dinêrî û her tim xwe spart hevalên xwe û çiyayên Kurdistanê.

DEWLETA TIRK A DAGIRKER LI WÊREKIYA JI POLA YA BÊRÎTAN Û HEVRÊYÊN WÊ RAST HAT

Bêrîtan bi vê baweriyê xwe di çand û exlaqa leşkerî de kûr kir û her tim li hember dagirkeran kîn û nefreta xwe zêdetir kir û israra xwe ya ji bo azadiya Kurdistanê xurtir kir. Di salên 2021 û 2022’an de beşdarî pêngava Bazên Zagrosê dibe û li gel hevalên xwe bi hêrseke mezin li dijî dewleta Tirk a dagirker û faşîst şer dike. Artêşa Tirk a dagirker di meha Tîrmehê de li Herêmên Parastinê yên Medyayê li dijî Şoreşgerên Kurd operasyonek dabû destpêkirin. Lê dewleta Tirk a dagirker bi cesareta pola ya Bêrîtan û hevrêyên wê re rû bi rû ma û ev wêrekiya polayî dewleta Tirk a dagirker tengav kir. Dewleta Tirk a faşîst nizanibû ku ev cesareta pola û têkoşîna bêhempa bi ti çek û artêşê nayê şikandin. Ji ber ku hevrê Bêrîtan û hevrêyên xwe bi biryar bûn ku dijmin tine bikin.

Piştî mehek û neh roj berxwedan û şerekî bê hempa, di 2’ê Gulana 2022’an de hevrê Bêrîtan û çar hevrêyên din piştî berxwedaneke bêhempa li dijî hemû êrîşên dewleta Tirk a dagirker ên bi çekên kîmyewî û gazên jehrî, tevlî karwanê şehîdên Kurdistanê bûn. Hê jî cesaret û îradeya hevrê Bêrîtan û hevrêyên wê di dilê hemû gerîlayan de bi hêztir dibe. Gerîla li dijî artêşa Tirk a dagirker û her cure teknîk û çekên kîmyewî şer dikin û derbên giran li dagirkeran dixin û nahêlin ku xwîna Bêrîtan û hemû cangoriyên azadiyê yên ku di têkoşîna azadiyê de şehîd bûne, li erdê bimîne û tola hemû şehîdan ji dagirkeran distînin.

Nav û Paşnav: Nîlûfer Xalidiyan
Nasnav: Bêrîtan Sine
Cih û dîroka jidayikbûnê: 2000 Sine
Cih û dîroka tevlêbûnê: 2017 Merîwan
Cihê şehadetê: Zap