Li gorî agahiyan çeteyên DAIŞ’ê îro saet li derdora 13.00’ê êrîş birin ser gundê Kurdên Kakayî yê bi navê Ebû Mihemed. Çeteyan êrîş bi ser pêşmergeyên Kurdên Kakayî de bir û şer nêzî nîv saetê dom kir.

Fermandarê Pêşmerge yê Daqûqê Amîd Araz ji ANF’ê re axivî û got, êrîş li nêzî ava Ruxanê pêk hatiye, êrîş hatiye şikandin û kesek ji wan nehatiye kuştin.

Çeteyên DAIŞ’ê beriya bi du rojan jî êrîş bi ser gundê Ebû Mihemed de biribûn û di êrîşê de 3 pêşmerge jiyana xwe ji dest dabûn, 8 pêşmerge birîndar bûbûn.

26’ê Tîrmehê jî êrîş bi ser Kurdên Feylî de biribûn, 5 sivîlan jiyana xwe ji dest dabû û  4 jê jî birîndar bûbûn.

Li Daqûqa ku li ser sînorê Hawîcê ya Kerkûkê ye, ku Hawîc di destê DAIŞ’ê de ye, li gel yekîneyên pêşmergeyan ên Heşdî Şabî û yekîneyên pêşmergeyan ên Kakayî her wiha pêşmerge û hêzên asayîşê yên bi ser PDK’ê û YNK’ê ve jî hene.