Hejmara Sibatê ya Newaya Jin bi manşeta "Ji Arîn heta Avesta, destûr ji dagirkeriyê re nîne" derket.

Di hejmara dawî de mijarên; êrîşên ji bo dagirkirina Efrînê, komploya 15'ê Sibatê, binpêkirina mafên mirovan li girtîgehan, raperîna gel a li Îranê, Jineolojî, berxwedana hunerê û sekna ciwanan a polîtîk tên nirxandin.

Rojda Yildirim, êrîşên dagirkeriyê yên Tirkiyeyê ku 20'ê Çileyê li dijî Efrînê dest pê kir, nirxand û bal kişand ser rastiya dîrokî ya gelê Kurd a li herêmê.

Endama Koordînasyona PAJK'ê Mizgîn Amed jî işaret bi bandora Komploya Navneteweyî ya 15'ê Sibatê kir ku di salvegera 19'an de ye û destnîşan kir ku dîrok ji aliyê têkoşer û berxwedêran ve tê diyarkirin.

Aktîvîsta TJK-E Zeynep Dersim jî ragihand ku li dijî komplokeran, Kurdan, gelan û jinan qezenç kirine.

Di rûpela Kurdî de jî Leyla Agirî heman mijarê dinirxîne û diyar dike ku sîstema Îmraliyê li pêşberî fikir, felsefe û îradeya Ocalan têk çûye.