Di çarçoveya pêngava "Azadî ji Abdullah Ocalan re, Çareseriya Siyasî ji Pirsgirêka Kurd re" çalakî dewam dikin. Yek ji wan çalakiyan li bajarê Strasbourgê yê Fransayê hate lidarxistin.

Di roja sêyemîn a pêngavê de Tevgera Jinên Kurd a li Ewropayê (TJK-E) panelek lidar xist. Panel li Navenda Çanda Elewiyan a Strasbourgê pêk hat û qala paradîgmaya azadîparêziya jinê ya Rêberê Gelê Kurd Abdullah Ocalan hate kirin.

'JINÊN KURD JIYANA NÛ BI PARADÎGMAYA ABDULLAH OCALAN AVA DIKIN'

Elîf Kaya di panelê de axivî û got, "Rêber Apo beriya dest bi têkoşînê bike got 'Kurdistan di bin mêtingeriyê de ye, jin kole ne' û du tespîtên krîtîk kir."

Elîf Kaya ragihand ku vê tespîtê esasê dîroka têkoşînê diyar kir û anî ziman, paradîgmaya Konfederal a Demokratîk bi vê tespîtê veguherî çareseriya bingehîn a pirsgirêkên cîhanê.

Elîf Kaya destnîşan kir ku Îdeolojiya Rizgariya Jinê (Jineolojî) bi têkoşîna mezin a jinên Kurd hate afirandin.

Bi dewamî Elîf Kaya anî ziman ku netewe dewlet dijminê jinan e û destnîşan kir ku jinên Kurd bi têkoşîna xwe li Rojava li ser paradîgmaya Rêberê Gelê Kurd Abdullah Ocalan jiyaneke nû ava kirine.

Elîf Kaya got, "Heta ku dîlgirtin û tecrîdkirina Rêber Apo bi dawî bibe wê têkoşîna me dewam bike" û anî ziman ku azadiya Abdullah Ocalan di heman demê de mifteya çareseriya siyasî ya pirsgirêka Kurd e.

'ABDULLAH OCALAN BERXWEDANEKE BÊHEMPA Û DESTANÎ DA DESTPÊKIRIN'

Endama Meclîsa PYD'ê Fadîle Sosin jî diyar kir ku ew ji Efrînê ye ya ku ji aliyê dewleta Tirk ve hatiye dagirkirin û got, "Kurdistan di bin dagirkeriya çar netewe dewletan de ye." Fadîle Sosin got, "Rêber Apo gelekî ku li ber tunebûnê bû rakir ser xwe, berxwedaneke destanî ya bêhempa afirand. Rêberê me ku ji bo gelê xwe canê xwe daniye holê, bi komployeke navneteweyî di bin gardiyantiya dewleta Tirk a dagirker de dîlgirtî ye."

Fadîle Sosin ragihand ku gelê Kurd şerê man û nemanê dide û got, "Weke jinên Kurd heta ku azadiya me pêk were, heta ku azadiya Rêberê me pêk were em ê têkoşînê dewam bikin."

Panel bi dirûşma "Jin, Jiyan, Azadî", "Bê Serok jiyan nabe" bi dawî bû.