Piştî ku rejîma Tirk di 21'ê Kanûnê de zêdeyî 22 sal cezayê girtîgehê li Hevseroka KCD'ê Leyla Guven birî, şeva heman rojê ew destgîr kir û girt. Bi pêşengiya Yekîtiya Jinên Kurd a Swîsreyê (YJK-S) li gelek bajaran çalakî hatin lidarxistin.

BERN: Bi banga Meclîsa Jinê ya Mizgîn mirovên şoreşger, demokrat û welatparêz li qada Bahnhofplatzê li hev civiyan û nerazîbûn nîşanî dîlgirtina Leyla Guven dan. Di çalakiyê de wêneyên Leyla Guven hatin hildan û aktîvîst Hediye Mûnzûr axivî. Hediye Mûnzûr anî ziman ku di şexsê Leyla Guven de êrişên qirkirina siyasî li dijî jin û gelê Kurd tê kirin û di bingeha vê yekê de jî dijminatiya li Kurdan, li gelan heye." Mûnzûr li dijî polîtîkayên qirêj ên dewleta Tirk, ji bo xurtkirina têkoşîna jinan bang kir. Hevserokê CDK-S Alî Şîmşek jî destnîşan ki rku li dijî faşîzma AKP-MHP'ê pêwîstî bi têkoşîneke hevpar heye. Di çalakiyê de her wiha li ser mijarê belavok hatin belavkirin.

BÎEL: Çalakî bi pêşengiya Komuna Jinê ya Arîn Mîrkan li pêşiya stasyona trenê ya navendî hate lidarxistin û girtina Guven hate şermezarkirin. Di çalakiyê de dirûşmên "Leyla Guven nayê bêdengkirin", "Leyla Guven rûmeta me ye", "Erdogan dijminê jinan e, kujerê jinan e" hatin qîrîn û belavokên bi zimanê Elmanî hatin xwendin.

LOZAN: Bi banga Meclîsa jinê ya Lajin li pêşiya dêra St. Laûrentê çalakiyek pêk hat. Çalakgeran ji bo berdana Leyla Guven û girtiyên siyasî bang kirin.

BASEL: Li qada Barfusserplatzê bi banga Meclîsa Jinê ya Ronahî çalakî hate lidarxistin û têkildarî girtina Leyla Guven daxuyanî hate dayin. Bi navê YJK-S'ê daxuyanî hate dayin û hate gotin, "Di şexsê Leyla Guven de jinên Kurd wê dest ji têkoşîna xwe bernedin û têkoşîna xwe mezintir bikin."

SOLOTHÛRN: Bi banga lezgîn a Komuna Jinê ya Pinar danê êvarê Kurdistanî li pêşiya stasyona trenê ya navendî li hev kom bûn û nerazîbûn nîşanî girtina Leyla Guven dan. Di çalakiyê de li dijî faşîzma dewleta Tirk dirûşm hatin qîrîn û belavokên bi zimanê Elmanî hatin xwendin. Di çalakiyê de bi navê komuna jinê ji bo bilindkirina têkoşînê bang hate kirin.