Rêvebera Navenda Ciwanan a Kelarê Geşe Mihemed Qadir, li ser rewşa jinan a li Başûrê Kurdistanê û têkoşîna jinên ciwan a li dijî zihniyeta mêrsalar axivî. Geşe Mihemed diyar kir ku jin di saziyan de kêm xuya dibin û hêviya wê ew e ku jin di siberojê de roleke bibandor bilîzin û wiha got: "Ez hêvî dikim ku ew jinên ku tenê di hin karên diyarkirî de rola wan heye, di siberojê de bikarin di hemû kar û saziyan de roleke bibandor bilîzin. Sedemeke din a nebûna jinan di karê saziyan de ji ber wê yekê ye ku erkeke giran li ser wan heye wek dayikbûn û hin kar hene ku jinan diwestînin û dem ji wan re namîne ku zêdetir xuya bibin. Ez bawer im di siberojê de jin bikarin zêdetir xuya bibin û roleke bibandor di civakê de bilîzin."

Geşe Mihemed Qadirê anî ziman ku herêma Kelarê herêmeke girtî ye, ji ber vê yekê hin astengî tên pêşiya jinan û got: "Cihê kêfxweşiyê ye ku em dibînin ku jin di sînemayê de hene, diçin civîn û semîneran. Wekî min got, em di herêmeke girtî de ne, ji ber vê yekê pêwîstiya me bi demê heye da ku zêdetir vebûn çêbe û em pêş bikevin. Jin berdewam hewl didin ku di hemû kar û çalakiyan de rola wan hebe û ez bawer im di siberojê de dikarin pêşengiyê bikin."