Li dijî darbeya desteserkirina Şaredariya Bajarê Mezin a Mêrdînê, Şaredariya Êlihê û Şaredariya Xelfetiyê ya Rihayê, şêniyên hersê bajar û navçeyan li dora şaredariyên xwe kom dibin.

MÊRDÎN

Endamên DEM Partiyê tayînkirina qeyûm a li Şaredariya Bajarê Mezin a Mêrdînê protesto kirin. Hevşaredarên Bajarê Mezin a Mêrdînê Ahmet Turk û Devrîm Demîr û gelek welatî hatin pêşiya şaredariyê.

Hevşaredar û kesên pê re xwestin bikevin avahiya şaredariyê lê polîsan bi mertalên xwe êriş birin ser û nehiştin bikevin şaredariyê. Parlamentera DEM Partiyê ya Mêrdînê Bêrîtan Guneş bertek nîşan da û wiha got: “Wê rûyê we nemîne ku hûn li rûyê zarok û malbatên xwe binêrin. Vî gelî ev sed sal e paşvegav neavêt û serî netewand. Dê serî netewîne jî. Bila ev jî wisa bê zanîn.”

Tevî dorpêçê jî gel hêj li ber şaredariyê disekine. Girse, bi dirûşman tayînkirina qeyûman protesto dike.

ÊLIH

Hevşaredara Êlihê Gulistan Sonuk piştî tayînkirina qeyûm çû pêşiya şaredariyê. Girseya li pêşiya şaredariyê kom bûyî dirûşmên “Qeyûmê dizek”, “Qeyûm wê biçin gel wê were”, “Na ji darbeyê re” û “Em ê bi berxwedanê bi ser kevin” berz kir.

Welatiyekê ku got mamoste ye bertek nîşanî tayînkirina qeyûm da û ev tişt anî ziman: “Madem wê we qeyûm tayîn bikira, wê demê we çima hilbijartin li dar xist? Min dayik û bavê xwe yê kal ji derve anî. Dengê xwe dan. Em vê neheqiyê qebûl nakin. Heke hûn bêdeng bimînin, wê demê hûn şeytanên bêziman in.”

Piştre jî Hevşaredar Gulistan Sonuk axivî û wiha got: “Wê walî bê vê derê û bibêje min pereyê we tevek ji bo polîtîkayên şer xerc kir. Me gotibû bê ka wê pereyê we ji bo çi xerc bikin. Di tevahiya pêvajoya hilbijartinê de me yek bi yek got bê ka wê çi bikin. Bila walî niha bê vê derê û bibêje bê ka wê çi bike. Bila were bibêje ez pariyê nanê we distînim. Tiştekî wisa nîne ku biryarê bi karmendekî bidin teblîxkirin... Tiştekî wisa nîne ku hûn ji bo hemû sûcên xwe memûran bi kar bînin. Dê ew bi xwe were û bibêje ‘Gelê Êlihê yê hêja, min bêyî ku şerm bikim 3 milyar deyn kir, vê jî besî min nekir û min çav berda yek qirûşê di berîka we de, ez niha jî ji bo xespkirina wê hatime.’

Sonuk nerazîbûn nîşanî dorpêçkirina avahiya şaredariyê da û wiha got: “Qeyûmê Êlihê bi akrepan, bi wesayîtên zirxî, bi yên kîrpiyan şaredarî xesp kiriye. Ew jî dizane ku rewa nîne lewma artêşa polîsan aniye û îradeya bajar bi wesayîtên zirxî xesp kiriye. Em li vir bangî hemû gelê Êlihê dikin. Em bangî jinan dikin. Em bangî ciwanan, jinan û hemû kedkaran dikin. Ev şaredarî ya me ye. Me bi rêjeyeke mezin a dengan ji xespa qeyûm rizgar kir. Em ê bajarê xwe, şaredariya xwe careke din ji talanker û mêtingeran re nehêlin û bi hev re rizgar bikin.”

Berxwedana gel a li pêşiya şaredariyê didome. 

XELFETÎ

Tayînkirina qeyûm a li Şaredariya Xelfetî ya Rihayê, li pêşiya şaredariyê hate protestokirin. Hevşaredarên Xelfetiyê Saniye Bayram û Mehmet Karayilan, Hevberdevka Komîsyona Hiqûqê ya DEM Partiyê Sevda Çelîk Ozbîngol, Hevserokê DEM Partiyê yê Rihayê Bekir Karakeçîlî, nûnerên Şaxa OHD’a Rihayê û gelek kes tev li bûn.

Di daxuyaniyê de Hevşaredar Mehmet Karayilan ev tişt anî ziman: “Biryara tayînkirina qeyûm ji bo me tune ye. Em vê biryarê nas nakin. Gelê me em hilbijartin. Em ê bi hêza ji gelê xwe digirin jî peywira xwe bidomînin. Em ê hêjayî gelê xwe bin. Me tu carî serî li ber zilmê nedanî û dê nedanîn. Ev zîhniyet dê di zilma xwe de bifetise. Yên tehemûla îradeya gel nakin dê têk biçin. Em ê zordestiya faşîzmê qebûl nekin.”

Avahiya şaredariyê hatiye dorpêçkirin û gel jî li pêşiya wê kom dibe.

OMER OCALAN: DESTHILATDARÎ DI NAVA XEFLETÊ DE YE

Parlamenterê DEM Partiyê yê Rihayê Omer Ocalan nerazîbûn nîşanî tayînkirina qeyûm a li 3 şaredariyên DEM Partiyê da. Ocalan, wiha got: “Armanca me ya herî mezin xurtkirina qada siyaseta demokratîk e. Bi rêbaza qeyûm re hewl didin kurdan li derveyî hiqûq û siyasetê bihêlin û ev yek bi her kesî dide windakirin. Bi sala ye heman rêbazan bi kar tînin û li benda encamên cuda ne. Ev yek tenê xwexapandin e. Em ê tevî gelên xwe li dijî vê neheqiyê têbikoşin.”