Di çarçoveya rêzeçalakiyên ji bo 25’ê Mijdarê, Roja Cîhanî ya Têkoşîna li dijî Tundiya li ser Jinan, bi sedan jinên kantonên Efrîn û Şehbayê li gundê Kefer Naya yê Şehbayê meşek lidarxist.

Meş ji naverasta Kefer Naya destpêkir. Di meşê de alên Kongreya Star, Yekîtiya Jinên Ciwan û pankartên “Na ji zewicandina zarokan re, ne ji destdirêjiya zayendî re, tecawîz sûceke nayê efûkirin” hatin hildan û dirûşmeyên şermezarkirina tundiya li ser jinan û qetilkirina zarokan hatin berzkirin.

Meş li qada dibistana Kefer Naya veguherî mîtîngê. Li wir deqeyek rêz hat girtin, piştre li ser navê Yekîtiya Jinên Ciwan a kantona Şehbayê Bedîe Muslim axivî û got: “Bi nêzbûna Roja Cîhanî ya Têkoşîna li dijî Tundiya li ser Jinan em Yekîtiya Jinên Ciwan sûc û binpêkirinên ji qetilkirin û tecawîzê ku li dijî tevahî pêkhateyan pêk tên, her wiha sûcên li dijî zarokan pêk tên şermezar dikin.”

Bedîe Muslim wiha domand: “Hişmendiya zilamsalar, urf û adet hê jî bi tevahî cûreyên tundiyê li ser jinan pêk tên, bi taybet jinên ciwan ên bi hêcetên cuda tên qetilkirin. Ev sûceke dûrî mafên civak û jinan e.”

Bedîe Muslim wiha gotina xwe bi dawî kir: “Em jinên ciwan ên kantona Şehbayê li ser fikir û felsefeya Rêber Abdullah Ocalan bi rêxistinkirî ne û soz didin ku em ê hesabê ji her kesê tundiyê li dijî jin û zarokan pêk tînin bipirsin û li rex jinan bisekinin û biparêzin.”

Meş bi berzkirina dirûşmeyan bi dawî bû.