Çalakiya nobedê ya li Berlînê di roja 8’an de didom e. Çalakî bi armanca rakirina tecrîda li dijî Rêberê Gelê Kurd Abdulah Ocalan û piştevaniya bi greva birçîbûnê ya li dijî binpêkirina mafan a li girtîgehan, hatibû destpêkirin.

Di roja 8’an de, piştî deqeyek rêzgirtin di derbarê salvegera 3’an a dagirkirina Efrînê de belavok hatin xwendin.

Li ser navê Tevgera Jinan a Êzidî Nûrê Alkiş axivî û Avesta Xabûr Efrîn a ku li Efrînê şehîd bûbû, Arîn Mîrkan a li Kobanê û Zîlan Andok a li Dêrsimê şehîd bûbû bibîr anî.

Di axaftina li ser navê malbatên şehîdan de hate gotin: “Em hevalên ku ev 55 roje di greva birçîbûnê de, Rêber Apo û şervanên azadiyê yên Kurd ji vir bi hezar caran silav dikin. Em ê bi berxwedana xwe serbikevin.”

Li ser navê PYD’ê Rênas Efrîn axivî û got: “Bi hezaran sal li Efrînê Kurd, Ereb û Turkmenan bi hev re dijiyan. Dewleta Tirk Rojava dagir dike û hemû gelan dike dijmin hev û ji hev dur dike.”

Hevberdevkê Fed Kurdê Menderes Canberk jî wiha got: “Em ji vir bang li Yekîtiya Ewrûpa dikin, xwedî li qanûnên xwe derbikevin. Li girtîgehên Tirkiye û Kurdistanê sûctê kirin. Nebin hevkarê van sûcan.”

Parlementera berê ya HDP’ê ya Amedê Nûrsel Aydogan jî got: “Di roja 55’an a greva birçîbûnê de em dibînin ku dewlet bi rola sê meymûnî radibin.”

Aydogan wiha dom kir: “Ji 20’ê Çileya 2018’an heta roja me ya îro li Efrînê dagirkerî hîn kûr dibe. Efrîna ku ji sedan 95’ê wê Kurd e, tê xwestin ku ziman û çanda wê ji aliyê dagirkeran ve were gûhertin. Îro li Efrînê Tirkî didin axaftin, perwerde bi Tirkî ne û doxtûr jî Tirkin. Nasname, çand û gel dixwazin asîmle bikin.”