ATÎK’ê bi wesîleya Cejna Remezanê peyameke nivîskî weşand.

ATÎK’ê di peyama xwe ya cejnê de got “Bi hêviya ku Cejna Remezanê bibe wesîleya xurtkirina biratî û aştiya di navbera gelan de, cejna hemû koçberên Misilman ên li Ewropayê pîroz dikin” û dewam kir: “Di Cejna Remezanê ya ji aliyê Misilmanan ve pîroz tê dîtin, weke li Iraq û Sûriyeyê, hema hema li hemû erdnîgariya Îslamê şerên mezheban, komkujî û rondikên çavan kêm nebûye. Li gor berjewendiyên hêzên emperyalîst û nokerên wan nakokiyên olî, mezhebî û neteweyî têne bikaranîn û sorkirin. Em dibînin çeteya DAIŞ’ê ya di destê wan kesên xerabiyan dikin bûye pêlîstok û ji aliyê hikûmeta AKP’ê ve bi awayekî veşartî tê destekkirin ola Îslamê ji bo berjewendiyên xwe yên polîtîk dike amûr.”

Di peyamê de hat destnîşankirin ku li Sûriyeyê û Iraqê di bin rûpoşa Îslamê de li Rojava, Kobanê û Şengalê, gelên Kurd, Êzidî û Xiristiyan têne qetilkirin. ATÎK’ê ji bo têkoşîna avakirina cîhaneke azad a bê şer û bê mêtingeh bang kir.