Xaça Sor û Tevgera Heyva Sor ên Navneteweyî, ji bo alîkariyê bi mexdûrên şewba vîrûsa koronayê bikin dest bi kampanyeyeke mezin kirin. Rêxistinan ji bo bexşa ji 3.2 milyar dolarî bang kirin.
Bi sedan komîteyên Xaça Sor û Heyva Sor ên li tevahiya cîhanê, her wiha tevgerên ku bi dehan milyon mirovên bi dilxwazî dixebitin li hev kom dikin, daxuyaniyek weşandin. Di daxuyaniyê de krîza mezin a ji ber şewbê hate bibîrxistin. Di daxuyaniyê de hate ragihandin ku ji ber krîzê hewl tê dayin alîkariya însanî bi lez bê kirin û pêwîstiya bi alîkariya ji bo mirovên tengav hate destnîşankirin.
Di daxuyaniyê de hate gotin, ji bo alîkariya bi lezgînî pêwîstî bi piştgiriya lezgîn a mirovan heye û hate ragihandin ku pêwîstî herî kêm bi 3.2 milyar dolarî heye. Alîkariya ku bê komkirin wê bi rêya komîte û federasyonên tevgera alîkariyê ji rêxistinên welatan re bê şandin.
Tevgera Xaça Sor û Heyva Sor ji sê yekîtiyên cuda pêk tên. Komîteya Xaça Sor a Navneteweyî (ICRC), Xaça Sor a Navneteweyî û Federasyona Civakên Heyva Sor (IFRC). Her wiha rêxistinên Xaça Sor û heyva Sor ên li 192 welatan pêk tên.
Di kampanya alîkariyê de ICRC dixwaze milyarek û 950 milyon dolarî kom bike. IFRC jî dixwaze bi rêya rêxistinên endamên xwe milyarek û 240 milyon dolarî ji bo alîkariyê kom bike.
