Di daxuyaniya hevpar de hate gotin, "Di êrîşên îro de bi taybetî qada depokirinê ya binê erdê ya Hûsiyan û çeperên çavdêriya hewayî û fuzeyan hatine bombekirin."

Ajanseke nûçeyan a ser bi Hûsiyan ve ragihandibû ku bombardûman hatiye kirin.

Li gel Washîngton û Londonê her wiha 'piştevanên' operasyonê Awûstralya, Bahreyn, Kanada û Hollandayê jî mohra xwe danîn binê daxuyaniya hevpar.

Li gorî daxuyaniyê, artêşên Emerîkî û Îngiliz ku ji destpêka meha Çileyê ve cara duyemîn operasyonên hevpar dikin, li Derya Sor û Kendava Adenê weke bersiva li êrîşên Hûsiyan ên li ser trafîka deryayî, 'salvoyeke nû ya êrîşên pêwîst û bi pîvan' hatiye kirin.

Di daxuyaniyê de hate gotin, "Êrîş ji bo têkbirina cebilxaneya Hûsiyan hatiye kirin ku li dijî jiyana deryavanên bêguneh û li hemberî bazirganiya cîhanê têne bikaranîn."

Hûsiyên nêzî Îranê ku di şerê bi Îsraîlê de piştgiriyê didin Hamas ê Fîlîstînî, roja Duşemê li peravên Yemenê berpirsyariya êrîşa li ser keştiyeke leşkerî ya DYE'yê girtibûn ser xwe.

Hûsî îdîa dikin ku ew piştgiriyê didin Fîlîstîniyên li Şerîda Xezeyê û bi fuzeyan û balafirên bêmirov êrîşê dibin ser keştiyên pêwendiya xwe bi Îsraîlê re hene.