Hate ragihandin ku li komuna Mwenda ya li herêma Nordê, bi rengekî 'hovane' êriş hatiye kirin û herî kêm 21 sivîlî jiyana xwe ji dest dane.

Li gorî daxuyaniya hêza aştiyê ya Neteweyên Yekbûyî (Monusco) bîlançoya êrişê ya destpêkê ye, lewma hejmara qurbaniyan dikare zêde bibe.

Ji rayedarên herêmî Donat Kîbwana bi daxuyaniyekê îdîa kir ku êriş ji aliyê Tifaqa Hêzên Demokratîk (ADF) ve hatiye kirin ku li dijî hikumetê şer dike. Di daxuyaniyê de hate ragihandin ku zêdeyî deh kes birîndar bûne yan jî winda bûne.

ADF ku bi komkujiya li Komara Kongo ya Demokratîk tê sûcdarkirin, weke komeke serhildêr tê naskirin ku ji aliyê Misilmanên li Ûgandayê ve hatiye avakirin. Rêxistinê ji sala 1995'an ve li rojhilatê Komara Kongo ya Demokratîk bi cih bûye û ji sala 2014'an ve jî tenê li herêma Benî di êrişên vê rêxistinê de zêdeyî hezar kesî jiyana xwe ji dest dan.

ADF'ê herî dawî ji meha Mijdarê û vir ve li bajarê Rwenzorî û derdora wê êrişên xwe giran kiriye. Di êrişên ku tê îdîakirin ji aliyê rêxistinê ve hatine kirin, tenê ji meha Kanûnê ve 62 kesî jiyana xwe ji dest dane.