Pisporên meteorolojiyê, hişyariyê didin ku wê li Polonya, Çekya, Awûstûrya û Slovakyayê baranên zêde bibarin.

Tevî ku rayedarên herêmê li hemberî felaketê tedbîran distînin, çalakiyên çandî jî hatin betalkirin û tesîsên avê jî hatin valakirin.

Serwîsên meteorolojiyê yên Çekya û Polonyayê dibêjin ku wê li hin herêman ji bo her metrekareyê 400 lître baran bibare û li gorî serwîsên Avûstûrya û Slovakyayê jî ev hejmar bi qasî 200 lîtreyî tê texmînkirin.

Bi taybet li bajarên Polonyayê ên weke Opele û Wroclawê ên li ser Çemê Oderê ji bo lehiya mezin hişyarî tên dayîn.

Li gorî meteorologan dibe ku ji Polonya heya Hirvatistanê lehiyeke mezin pêk were û tê payîn ku li Bavyera, Swîsre, Avûstûrya û Tirolê zêde berf bibare.

ARTÊŞ AMADE YE

Serokwezîrê Awûstûryayê Karl Nehammer hişyarî da ku pileya bilindahiya ava Çemê Tûnayê gelekî zêde bibe û da zanîn ku ger hewce bike 1000 leşkerên wan ji bo midaxileyê amade ne. Her wiha artêşa Slovakyayê û tîmên wan ên rizgarkirinê jî ji bo felaketan xwe amade kirine.