Belgefîlma Hêza di Festîvala Fîlman a SîcîlyAmbîense ya 14’emîn de hêjayî Xelata Mafên Mirovan a Rêxistina Efûyê ya Navneteweyî hate dîtin. Çêker Afat Baz xelat diyarî jinên têkoşer û şehîd kir ên ku li hemberî DAÎŞ’ê şer kirine.
Festîvala Fîlman a 14’emîn a SîcîlyAmbîensê îsal di navbera 11-16’ê Tîrmehê de li Şaredariya San Vîto Lo Capo ya Sîcîlyayê hate kirin. Ji Rojhilata Dûr, Efrîka, Rojhilata Navîn, Ewropa û Emerîkayê 35 berhem tevlî festîvalê bûn.
Ji xeynî nîşandanên fîlman semîner û panel jî hatin li dar xistin û di juriyan de bi tenê jinan cih girtin.
Di festîvalê de ji bo fîlmê herî baş, belgefîlma herî baş, mafên mirovan û hawîrdorê xelat hatin dayîn.
‘XELAT A WAN JINAN E KU LI HEMBERÎ DAÎŞ’Ê ŞER KIRINE’
Belgefîlma Hêza hêjayî Xelata Mafên Mirovan a Rêxistina Efûyê ya Navneteweyî hate dîtin.
Li ser navê Rêxistina Efûyê ya Navneteweyî Francessa Corbo di xelatdayînê de got “Di çîroka Hêzayê de ya ku ji nav destê DAÎŞ’ê reviyaye û piştre li hemberî DAÎŞ’ê şer kiriye, derhênera jin Derya Denîz vegotineke xurt kiriye.”
Çêker Afat Baz jî li ser navê koma belgefîlmê xelat stend û got “Xelat a wan jinan e ku li hemberî feraseta DAÎŞ’ê şer kirine û li ser vê rêyê şehîd bûne.”
XELATA AMNEST INTERNATÎONALÊ
Amnesty Internatîonal li dinyayê mafên mirovan diparêze. Li temamî dinyayê herî kêm 2 milyon endamên wan û 5 milyon çalakvanên wan hene. Xelata Amnesty Internatîonalê di qada mafên mirovan de di nav xelatên herî bi prestîj de cih digire.
Belgefîlma Hêzayê jî heta niha xelatên wekî belgefîlma herî baş, fîlma herî baş û xelata mafên mirovan jî tê de bi giştî 6 xelat stendiye.
