Şaredara Cenevreyê Christina Kitsos a ji Partiya Sosyalîst ku di tûra destpêkê ya hilbijartinên Şaredariya Bajarê Cenevreyê de bû yekemîn û xwe ji bo tûra duyemîn amade dike, bal kişand ser girîngiya parastina piraniya endamên çep ên li rêveberiya bajarê Cenevreyê û bang li hemû hilbijêran kir ku dengê xwe bi kar bînin.

Tûra duyemîn a hilbijartinên xwecihî yên Şaredariyên Kantona Cenevreyê wê di 13'ê Nîsanê de bê kirin. Di 26'ê Adarê de ku tûra destpêkê hate kirin, namzetên ku nekarîn piraniya mutleq bi dest bixin, wê bikevin pêşbirkê. Hilbijêr wê ji bo diyarkirina nûnerên li organên rêveberiya şaredariyê careke din dengê xwe bi kar bînin. Hilbijêrên li Şaredariya Bajarê Cenevreyê wê Desteya Rêveberiya Şaredariyê (Conseil administratif) a ji 5 kesan diyar bikin. Partiyên çep ên bajêr ku di bin sîwaneke hevpar de tevlî hilbijartinê dibin, dixwazin serweriya li desteyê biparêzin. Di hilbijartinênên tûra yekemîn de ti ji namzetan nekarîn 20 hezar û 100 dengî werbigirin ku piraniya mutleq e û bi vî rengî nekarîn bêne hilbijartin. Di hilbijartinên rêveberiya vî bajarî de ku zêdeyî 190 milet lê ne û li qada navneteweyî xwedî girîngiyeke mezin e, dengê koçberan wê roleke mezin bilîze. Koçberên li Cenevreyê dimînin û welatiyên Swîsreyê ne, her wiha yên ku herî kêm 8 sal in li bajêr dimînin dikarin di vê hilbijartinê de dengê xwe bi kar bînin. Yek ji civakên herî çalak ên li bajêr jî Kurd û demokratên Tirkiyeyî ne. Namzeta Partiya Sosyalîst (PS) Şaredara heyî ya Cenevreyê Christina Kitsos ku weke favorî tê dîtin, li ser mijarê ji ANF'ê re axivî.

Christina Kitsos bi bîr xist ku Cenevre welatekî ji gelek çandan e ku ji zêdeyî 190 neteweyan mirov lê ne û got, "Dînamîkên navxweyî yên bajêr bi saya herikîna koçê diyar dibin. Di vê serdemê de em dibînin ku pîramîda nifûsê berevajî dibe û eger ev civak hîn jî kêrhatî be ev yek bi saya jin û mêrên koçî Swîsreyê, koçî Cenevreyê kirine. Pirsgirêka hêza kar a li gelek sektoran, bi extiyarbûna nifûsê re wê hîn girantir bibe. Lewma li ber destê me alternatîfeke bêdawî ya çareseriyê nîne. Ya em ê koçberan bi rengê herî baş pêşwazî û entegre bikin, ya jî em ê li gel vê yekê polîtîkayên malbatê biafirînin û tedbîrên weke destûra dayik û bav werbigirin. Li Swîsreyê, bi taybetî jî li Cenevreyê rêjeya zayînê gelekî kêm dibe. Civatên koçber eger zêdeyî 8 sal in li Cenevreyê bin, hingî xwedî mafê dengdanê ne. Yanî hîn nebû be welatiyên Swîsreyê jî ev mafê wan heye. Haya gelek kesan ji vî mafî jî nîne. Ji ber vê yekê weke gava destpêkê divê mirov van civatan agahdar bikin û ji wan re bibêjin, 'Mafê we yê dengdanê heye, hûn dikarin temsîlkarên xwe hilbijêrin'. Her wiha hin civat di vê mijarê de gelekî berpirsyar û aktîf tevdigerin. Mînak, civaka Kurd ji vî aliyê polîtîk ve yek ji civatên çalak e. Di bingeha vê de jî têkoşîna dîrokî ya gelê Kurd heye. Lewma rewşeke matmayî nîne ku gelê Kurd li Cenevreyê jî li deverên din ên cîhanê jî ji aliyê siyasî ve bi rengekî çalak dixebitin."

Christina Kitsos anî ziman ku Cenevre bajarekî cîhanê ye, ew cih e ku Peymanên Cenevreyê lê hatine mohrkirin û got, "Em di demeke welê de ne ku derb li piralîbûnê hatiye xistin, hurmet ji hiqûqa mirovî ya navneteweyî re nayê nîşandan û ev hiqûq tê binpêkirin. Diyalog ku yek ji pîvanên bingehîn ên mafên mirovan e, hevkarî, azadî, edalet û tayînkirina çarenûsa xwe ya gelan gelekî girîng e û divê em vê yekê bi dengekî bilind bînin ziman. Ya ku mafê xwerêvebirinê ya gelan misoger bike ev pîvan e. Ji ber vê yekê bi taybetî di vê dema zehmet de gelekî girîng e ku asta Cenevreyê bê xurtkirin. Yekane rêya serxistina vê yekê jî yekîtî ye, lêgerîna li rêyên hevkariyê ye, xurtkirina têkiliya navbera gelan û bajarên ji nirxên hevpar e. Şaredariya Cenevreyê beriya niha gelek pêşnûmeyên li ser bûyerên li Kurdistanê nirxand ku ji aliyê endamên me yên meclîsê ve hatin pêşkêşkirin. Armanca bingehîn a nirxandina vê mijarê di rêveberiya şaredariyê de ew bû ku em vê mijarê di asta kanton û federal de bixin rojevê, ji ber ku têkiliyên me yên derve bi esasî di vê astê de diyar dibin. Her wiha di nava Partiya Sosyalîst de di asta federal de gelek hevrêyên me hene ku bi meseleya Kurd re ji nêz ve eleqedar dibin. Ez bi wan re yekser di nava têkiliyê de me."

Têkildarî hewldan û daxwazên Kurdistaniyên li Cenevreyê yên ji bo azadiya Rêber Abdullah Ocalan jî Şaredara Cenevreyê Christina Kitsos got, "Ez bi xwe jî tevlî hin xwepêşandanan bûm ku bi armanca azadiya Birêz Ocalan hatin lidarxistin. Dixwazim destnîşan bikim ku piştevaniyê bi gelê Kurd re dikim û divê mafên wan ên bingehîn bêne parastin. Em zanin ku têkildarî rewşa tenduristiyê ya Abdullah Ocalan û şert û mercên wî yên li girtîgehê demeke dirêj agahî nedihat wergirtin. Her wiha em dibînin ku bangên wî yên ji bo aştiyê û pêşniyarên wî yên bi nêrîneke gerdûnî her tim li ber çavan nayên girtin. Ev rewş salên dûr û dirêj e dewam dike. Bangên ji bo berdana wî û hurmeta li mafên bingehîn timî têne dubarekirin. Her wiha em dibînin ku tevgerên ciwanan ên navneteweyî bi vê armancê li Cenevreyê, bi taybetî li Qada Neteweyên Yekbûyî dicivin. Li gel van hemû hewldanan hîn jî dewlet biryaran werdigirin û gelek caran biryarên kêfî werdigirin. Li gel vê yekê jî divê têkoşîn dewam bike. Weke rêveberiya şaredariyê em ê bi dewamî li pişt van daxwazan bin. Birêz Ocalan beriya niha jî ji bo çareseriya pirsgirêka Kurd a bi rêyên demokratîk û aştiyane bang kiribû û mixabin di helwesta dewletê de ti guhertin nebû bû. Em nizanin bê li pêşberî banga dawî wê helwesteke çawa nîşan bidin. Feraseta rêveberiyê ya li Tirkiyeyê bandorê li mafên mirovan û her kesî dike ku mafên mirovan diparêzin. Jin, rojnamevan, rewşenbîr, nivîskar her kes têne mexdûrkirin. Her kesên ku piştgiriyê didin vê têkoşînê berdêlê didin."

Di dawiya axaftina xwe de Christina Kitsos li ser tûra duyemîn a hilbijartinê got, "Tûra duyemîn a hilbijartinê 13'ê Nîsana 2025'an wê bê kirin. Li gel hempîşeyên xwe yên ji Partiya Sosyalîst Joëlle, ji Partiya Keskan Alfonso Gomez û Marjorie de Chastonay weke çar namzet em di nava tifaqê de ne. Ji bo me gelekî girîng e ku di rêveberiya bajarê Cenevreyê de serweriya çepgiriyê biparêzin. Li gelek bajarên Ewropayê, her wiha li Swîsreyê û li Cenevreyê jî em dibînin ku tevgerên populîst bilind dibin. Ji ber vê yekê jî parastina piranî û serweriya çepgiriyê ji bo me bi rastî jî mijareke krîtîk e. Ji ber vê eykê hemû hilbijêrên me yên li bajêr divê heta 13'ê Nîsanê danê nîvro dengê xwe bi kar bînin.

Herî dawî dixwazim bibêjim ku ez heyranê gelê Kurd im, piştgiriya xwe ya ji bo gelê Kurd nîşan didim. Gelê Kurd ji bo mafê xwe yê diyarkirina çarenûsa xwe, ji bo azadî û edaletê gelek caran wêrekî kir. Jinên Kurd nîşanî me dan bê wêrekî çi ye û ev yek ji bo me hemûyan derseke. Min beriya niha jî di çalakiyên cuda de anî ziman; Divê Abdullah Ocalan azad bibe, ji bo gelê Kurd jî divê êdî çareseriyeke wekhev û mayinde bê peydakirin."