Endamên Kongreya Star û rêxistina Institue of Contemporary ARTS (ICA) bi rêya SKYPE telekonferansek organîze kirin. Di konferansê de bi navê Koordînasyona Kongreya Star Evîn Swêd, bi navê YPJ a Akademiya Enternasyonal Asmîn Ronî û li ser navê Komîteya Aboriyê ya Kongreya Star Hîvda Serêkaniyê axivîn.

Konferans li Salona Sînema ya ICA'yê pêk hat û beşdar bi giranî li ser karên Kongreya Star ên li Rojavayê Kurdistanê û astengiya dewletan a li pêşiya beşdarî û alîkariya enternasyonalîstan sekinîn.

Jina akademîsyen ku beriya niha hatibû Rojava Rahila Gupta hem nêrîn û çavderiyên xwe, hem jî asta konferderalîzma jinan û pêşengtiya wan anî zima. Akademîsyen û hunermend Jaye ya akademîya Jin jî helbesteke li ser Şoreşa Jinê ya li Bakurê Sûriyeyê/Rojava xwend. 

Rojnamevan û nivîskara Hîndîstanî Rahîla Gupta û endama Kongreya Star Rûhaş Şêx konferans organîze kirin.

200 jin tevlî konferansê bûn. Xaltîka Hêlîn Qereçoxê (Vîctoria Cambell) ku di berxwedana Serdemê ya Efrînê de şehîd bû li konferansê amade bû. Her wiha malbatên cangoriyên enternasyonal jî tevlî bûn.

Evîn Swêd di destpêkê de Şoreşa Rojavayê Kurdistanê weke şoreşa jinê bi nav kir û bi xêrhatina hemû jinên aktîvîst kir. Evîn Swêd got, "Kongreya Star bi 28 jinan dest bi karê xwe kir û îro hejmar gihaye bi deh hezaran jinan. Vê rêxistinê bi jinên Kurd dest pê kir niha giha bi hezaran jinên enternasyonalîst, Suryan, Ereb, Kurd, Ermenî û Keldan."

Evîn Swêd behsa sîstema Kongreya Star û pîvanên jinan ji aliyê aborî çandî, leşkerî û birdozî ve kir. 

Piştre li ser navê Yekîneyên Parastina Jinê(YPJ) ya Akademiya Enternasyonalîst Asmîn Ronî axivî.

Asmîn Ronî qala têkoşîn û berxwedana YPJ'ê kir û got, "Azadî ne bi tenê pirsgirêka jinên Kurd e. Pirsgirêka hemû jinan e."

Beşdaran bal kişandin ser eleqeya ji bo têkoşîna jinên Bakurê Sûriyeyê û gotin, gelek kes dixwazin tevlî refên jinên Bakurê Sûriyeyê bikin, lê belê tên astengkirin.

Di dawiya telekonfearnsê de sînevîzyonek li ser danasîna karê Kongreya Star hate kirin û konferans bi qîrîna dirûşma "Jin jiyan azadî" qediya.