Bi sedan şênî, endamên saziyên sivîl û partiyên siyasî yên li taxên Şêxmeqsûd û Eşrefiyê, li rojavayê taxa Şêxmeqsûdê ya bajarê Helebê kom bûn û li dijî komploya navneteweyî dest bi meşê kir.

Di meşê de wêneyên Rêberê Gelê Kurd Abdullah Ocalan û pankertên bi nivîsên “Bi îrade û berxwedanê em ê komploya li dijî Rêber Apo têk bibin” û “Bimire komployên navneteweyî, îxaneta Barzaniyan, Bijî berxwedana Gerîla” hatin bilindkirin û dirûşmeyên “Bê Serok Jiyan Nabe” hatin berzkirin.

Meş li Qada Cebenat a li rojhilatê taxê rawestiya û li wir piştî rêzgirtinê axaftin hatin kirin.

Hevserokê Meclîsa Giştî ya Taxên Şêxmeqsûd û Eşrefiyê Welat Mamo axivî û bal kişand ser berxwedana Rêberê Gelê Kurd Abdullah Ocalan a li Îmraliyê û got: “Rêbertî polîtîkayên dagirkerî û qirkirinê yên dewletên kapîtalîst ên li ser gelan tê ferz kirin, red kir û bi fedekariyeke mezin hewl da gelan azad bike. Lewma divê em ranewestin û li her qadê têbikoşin. Divê em li ser feraseta Berxwedan Jiyan e ya şehîd Mazlûm Dogan bimeşin.”

Endama Însiyatîfa Azadiya Rêberê Gelê Kurd Abdullah Ocalan a Sûriyeyê Zeyneb Hebeş jî behsa komploya 9`ê Cotmehê kir û ev tişt gotin: “Îro salvegera 25`an a destpêkirina komploya navneteweyî ya li dijî Rêbertî ye, ku bi derketina wî ji Sûriyeyê dest pê kir. Rêbertî 24 sal li Sûriyeyê ma, lê têkoşîn meşand û xelkê wê perwerde û birêxistin kir. Rêbertî li hember projeyên pergalên desthilatdar, projeya yekîtiyê û jiyana hevbeş pêşkêş kir.”

Zeyneb bang li gelên azadîxwaz û rêxistinên hiqûqî kir ku li hember komployê helwesteke zelal nîşan bidin û zextê li dewleta Tirk a dagirker bikin da ku tecrîdê bi dawî bike.

Çalakî bi dirûşmeya “Bê Serok jiyan nabe” bi dawî bû.