Bi sedan welatiyên Amûdê cenazeyê şervanê YPG’ê Dilo Hesekê (Dilbirîn Salman) ku di ‘Pêngava Bagera Cizîrê’ de şehîd bûbû ji navenda Heyva Sor wergirtin û bi karwanekî ber bi Goristana Şehîd Îsmaîl ve ketin rê.

Li goristanê ji bo bîranîna şehîdên têkoşîna azadiyê deqîqeyek rêz hate girtin û ji aliyê şervanên YPG’ê ve merasîmeke leşkerî hate lidarxistin. Piştre li ser navê Saziya Malbatên Şehîdan Bavê Alan axivî, sersaxî ji malbata şehîd re xwest û diyar kir ku wê heta dawiyê rêya şehîdan bişopînin.

Piştre ji fermandarên YPG’ê Aigrî Jînda axivî û got; “Hevalê me şehîd Dilo, bi coşeke mezin tevlî şoreşê bû û li hember hemû cûreyên êrîşan yên li ser şoreşa gel li ber xwe da û herî dawî jî şehîd bû. Em rêhevalên wî, soza domandina xeyalên wî didin û ji malbata xwe ya hêja re sersaxiyê dixwazin."

Piştî axaftinan nasnameya şehadetê hate xwendin û radesti malbata şehîd hate kirin. Girseya gel bi dirûşme û tilîliyan cenazeyê şervanê YPG’ê Dilo Hesekê li goristanê veşartin.