Cenazeyê Endamê Hêzên Ewlekariya Hundirîn Mehmûd Diyab bi merasîmek girseyî li Goristana Şehîd Rûstem Cûdî hat veşartin. Bi sedan şêniyên navçeya Dirbêsiyê ya Kantona Hesekê û endamên saziyên sivîl û leşkerî yên navçeyê tev li merasîma cenaze bûn.

Girseya gel cenazeyê şehîd ji avahiya Meclîsa Malbatên Şehîdan a navçeya Dirbêsiyê wergirtin, bi karwanekî wesayîtan ber bi goristanê ve ketin rê. Hevseroka Meclîsa Malbatên Şehîdan a navçeya Dirbesiyê Edla Misto ku li vir axivî, sersaxî ji malbata şehîd re xwest û destnîşan kir ku heta Sûriyeyeke demokratîk ava bikin û bigihijin armanca xwe dê li ser şopa şehîdan bin.

Piştre, endamê Hêzên Ewlekariya Hundirîn Bircus Dirbêsiyê axivî û soza şopandina şehîdan heta pêkanîna armancên wan da.

Bi navê malbata şehîd, birayê şehîd, Samir Diyab wiha axivî: "Birayê min ev rê hilbijart, em jî soz didin wî ku xwedî li armancên wî derkevin û ewlehiya herêmê biparêzin."

Di dawiya merasîmê de, endama Meclîsa Malbatên Şehîdan a Dirbêsiyê Îman Dadûş wesîqeya şehadeta şehîd xwend û radestî malbata wî kir.

Piştî axaftinan cenazeyê şehîd bi tilîliyan hat veşartin.