Bi sedan şêniyên Til Hemîs û gundewarên wê li goristana şehîdan a li rojavayê navçeyê kom bûn û beşdarî merasîma veşartina cenazeyê şervanê QSD′ê Ziyad Ehmed El Îbrahîm (Ramî Til Hemîs) bûn. Ramî Til Hemîs di êrîşa hewayî ya dewleta Tirk a dagirker a li dijî hêzên parastina Kampa Holê yên li gundê Qeyrewan ê Til Hemîsê de şehîd bûbû.

Li goristanê, endamê Rêveberiya Meclîsa Malbatên Şehîdan a Til Hemîsê Ebdullah El Salim sersaxî ji malbata şehîd re xwest û got: "Dewleta Tirk a dagirker bi hedefgirtina şêniyan û hêzên ewlekariyê û leşkerî hewl dide armancên mêtîngeriyê pêk bîne.”

Şervanê Hêzên Meclîsa Leşkerî ya Til Hemîsê Xalid El Ehmed jî soz da ku heta pêkanîna serkeftinê li dijî siyasetên qirkirin û dagirkeriyê ew ê rêya şehîdan bişopînin û wiha got: "Em serî li hember dagirkeran natewînin, em ê ji her kesê ku îxanetê li şênî û welatê xwe bike, hesab bipirsin."

Piştî axaftinan nasnameya şehîd Ziyad El Îbrahîm hate xwendin û radestî malbatê hate kirin. Cenazeyê şehîd di nava tilîliyên dayikan de hat veşartin.