Partiyên siyasî û rêxistinên civakî yên sivîl ku li Kantonên Efrîn û Şehbayê kar û xebat dimeşînin, ragihandin ku ew jî beşdarî pêngava ‘Ji Abdullah Ocalan re azadî û ji pirsgirêka Kurd re çareseriya siyasî’ dibin.
Bi dehan endamên sazî, yekitî, partî, tevgerên siyasî, oldar, Meclisa Kantona Efrîn û Şehbayê, koçberên Efrîn û şêniyên Şehbayê li Parka 4′ê Nîsanê ya li gundê Maratê yê girêdayî navçeya Ehdasê ya Şehbayê kom bûn û têkildarî mijarê dauxyanî da.
Çalakvanan wêneyên Rêber Abdullah Ocalan û pankartên bi nivîsên ′Dem dema azadiyê ye′, ′Azadiya Rêber Apo misogeriya avakirina nenteweya demokratîk e′ hildan.
Hevseroka Meclisa Kantona Efrîn û Şehbayê Melek Hisên daxuyanî xwend. Melek bal kişand ser pêngava cîhanî ya ji bo azadiya Rêberê Gelê Kurd Abdullah Ocalan hatiye destpêkirin û wekî bertekeke xwezayî û mirovî ya civaka demokratîk a mirovî û azad a cîhanê li hember komploya navneteweyî bi nav kir.
Di daxuyaniyê de hat gotin: “Em sazî, partî, tevger, kesayet û koçberên Efrînê û niştecihên Şehbayê piştgiriya xwe ji pêngavê re nîşan didin.”
Di dewama daxuyaniyê de hat destnîşankirin ku çareseriya siyasî bi pêkanîna azadiya fîzîkî ya Rêber Abdullah Ocalan pêkan e û hat gotin ku ev pêngav ji bo rizgarkirina mirovahiyê, ekolojiyê û jinan e.
Di dawiya daxuyaniyê de banga li gelê Kurd, gelên Rojhilata Navîn û bi taybet gelê Ereb, gelên Ewropa û Tirkiyeyê hate kirin ku ji bo şikandina tecrîdê û pêkanîna azadiya fîzîkî ya Rêberê Gelê Kurd Abdullah Ocalan têbikoşin û hat gotin: “Azadiya fîzîkî ya Rêbertî tê wateya rizgarkirina Efrîn, Bab, Amed, Serêkaniyê, Mehabad û tevahî herêmên dagirkirî.”
