Aktîvîsta Hollandî Lida Weerts ji Norwêcê hat Stockholmê û tevlî greva birçîbûnê ya li dijî tecrîdkirina Ocalan bû.

Weerts diyar kir ku wê li Hewlêrê serdana Nasir Yagiz kiriye û soz daye wî ku wê daxwazên çalakgerên greva birçîbûnê ji raya giştî re ragihîne.

Weerts anî ziman, mafê Rêberê Gelê Kurd Abdullah Ocalan e ku mîna girtiyan hemûyan karibe malbat û parêzerên xwe bibîne û diyar kir, tecrîdkirina wî li dijî mafên mirovan e.

Weerts anî ziman, Ocalan ji bo paşeroja Kurdan û gelên Rojhilata Navîn girîng e û got, bi bidawîbûna tecrîdkirina Ocalan re pêvajoyeke nû ya aştiyê dikare dest pê bike.

'BÊDENGÎ CIHÊ ŞERMÊ YE'

Weerts bi bîr xist, Ewropa û Norwêc qala mafên mirovan û demokrasiyê dikin û got, "Ji ber ku serî li ber Erdogan ditewînin û li pêşberî greva birçîbûnê bêdeng in, li ber xwe dikevin."

Weerts anî ziman, ew rewşa li Tirkiye û Kurdistanê ji nêz ve dişopînin û got, ew matmayî dimîne ku her kes piştî hilbijartinê rewşa Stenbolê nîqaş dikin, lê belê li ser desteserkirina mafên li Kurdistanê kes naaxive.

'EZ GELEKÎ HURMETÊ NÎŞANÎ WE DIDIM'

Lida Weerts a Hollandî ji bo Nasir Yagiz, Leyla Guven û çalakgerên greva birçîbûnê hemûyan peyameke wiha da:

"Ez gelekî hurmetê nîşanî we û têkoşîna we didim. Divê mirovên wiha bi biryar û têkoşer jiyana xwe ji dest nedin, divê bijîn. Ez soza ku min daye Nasir bi cih tînim. Çalakiya grevên birçîbûnê û daxwazên wan ji raya giştî re radigihînim."