Sancar bi heyeta SP'ê ya bi serokatiya endamê SP'ê yê Komîsyona Têkiliyên Derve ya Swîsreyê Martîn Naef re hevdîtin kir.

Naef ragihand ku ku HDP'ê bi komkirina cihêrengiyan û bernameya xwe re gelekî bandorê li wan dike û got, "Em dixwazin bi HDP'ê re têkiliyeke nêz deynin û pê re bixebitin. Serketinên HDP'ê bandorê li me dike û me dixe nava coş û kelecanê."

Sancar jî di hevdîtinê de diyar kir ku ew dixwazin bi Partiyên Sosyal Demokrat ên li Ewropayê re têkiliyeke xurt deynin, bi hev re bixebitin û got, "Em dixwazin hilbijartin, ku bingeha demokrasiyê ye, di nava mercên adîl û pêbawerî de bên lidarxistin. Em li bendê ne ku derdorên hestyar, weke çavdêr hilbijartinan bişopînin. Em bang li Demokratên Sosyal jî dikin, ku ji bo agirbest pêk were û pêvajoya çareseriyê bi awayekî ewle ji nû ve destpê bike, bi berpirsyarî tevbigerin. Daxwaza me ew e ku têkiliyên me di asta sazîbûn û sîstematîk de bidomin. Ji bo çareseriya pirsgirêkên Tirkiyeyiyên li Swîsreyê dijîn, em amade ne hevkariyê bikin."