Xebat û çalakiyên HDP'ê yên ji bo demokrasiyê didomin. Di çarçoveya "Meşa Demokrasiyê" ya "Em bi hev re di demokrasiyê de bibin yek" de HDP'ê li Hatayê civîna bawerî û gelan li dar xist.

Hevserokê Giştî yê HDP'ê Mîthat Sancar, Hevberdevka HDK'ê Îdîl Ugurlu, Hevseroka Giştî ya SYKP'ê Canan Yuce, Endamên Navenda Giştî ye ESP'ê Çiçek Otlu û Osman Kara û nûnerên rêxistinên Elewî û Ereban li Hatayê beşdarî "Hevdîtina Gelan û Baweriyan" bûn. Dîsa endamên Kongreya Îslama Demokratîk (KÎD) û parlamenterê Serbixwe Cihangir Îslam jî amade bû. Parlamentera HDP'ê ya Edeneyê Tulay Hatimogullari axaftina destpêkê kir û xêrhatin kir.

Hevserokê Giştî yê HDP'ê Mîthat Sancar jî ji ber tevlêbûna zêde kêfxweşiya xwe anî ziman. Sancar anî ziman ku Belgeya wan a Helwestê banga hemû kesên alîgirê demokrasiyê ye û wiha got: "Divê her kes li cih û warê xwe li dijî neheqî û bê edaletiyê dengê xwe bilind bikin û bibin bersîva vê bangê. Armanca meşa me em îtîraza xwe bînin ziman û bi gel re parve bikin. Meşa me dengekî pir mezin derxist. Ev dengê îtîrazê ye. Ev îtîraza li dijî zilmê, li dijî şer û li dijî polîtikayên înkar û îmhayê ye. Bêdengî ne çareserî ye. Armanca hevdîtinê em vê îtîraza xwe û dengê xwe bilind bikin. Li dijî xerabî û tundiyê em dengê xwe bêtir bilind bikin. Armanca me em meşa hevpar bêtir mezin bikin û hinek din bimeşin."

'DIVÊ HEMÛ BAWERÎ BIBIN YEK Û DENGÊ XWE BILIND BIKIN'

Sancar, bal kişand ser şerê li Rojhilata Navîn belav dibe û wiha lê zêde kir: "Şer ne tenê li Sûriyeyê heye. Li hemû herêmê şer belav bûye. Eger em hemû bi hevre ji bo aştiyê neyên cem hev û nebin yek ev polîtîkayên şer dê bi deh hezaran mirovên din bikuje. Divê bi lez em em hêza aştiyê ava bikin. Bi lez pêdivî bi Hêz û Tevgera Hevpar a Aştiya Rojhilata Navîn heye. Aştî ne tenê pirsgirêka axekê ye. Li Tirkiyeyê pirsgirêkek mezin a aştiyê heye. Li vî welatî çareseriya pirsgirêka Kurd a bi aştî û demokrasiyê şert e. Îro pêdiviya me bi Tevgera Aştiya Rojhilata Navîn heye. Li Sûriyeyê di şerê navxweyî de herî zêde DAIŞ'ê talan û wêran kir. Li dijî zilmê serhildan heye. Li dijî zilmê îtiraz heye. Divê dengê me li hemû cîhanê belav bibe. Divê em hemû bawerî û ol bibin yek û dengê we bilind bikin.

Piştî axaftina Sancar bernameya civînê ji çapemeniyê re girtî domîya.