Parlamenta Iraqê îro bi rengekî asayî li hev civiya. Parlementerên Tevgera Goran, Komela Îslamî û beşek ji parlamenterên YNK'ê ji bo beşdarî rûniştinê bibin çûn Bexdayê. Lê belê ji ber helwesta Iraqê ya li hember referandûma Başûrê Kurdistanê parlementer ji salona meclîsê vegeriyan û tevlî rûniştinê nebûn.

Hevpeymana Niştimanî ya Iraqê di vê der barê de daxuyaniyeke fermî belav kir û ragihand, ku ji bo nirxandina rewşa parlamenterên Kurd ew bi serokê Parlamentê Selîm Cibûrî re rûniştine û biryarên girîng di vê civînê de derketine.

Di daxuyaniyê de hat ragihandin, ku li gorî yek ji van biryaran, her parlamentereke/î Kurd ê bixwaze beşdarî rûniştina parlamentê bibin, wê li dijî referandûma başûr bên dîtin.

Di dewama daxuyaniyê de hat gotin, ku wê lîsteyek ji parlamenterên alîgirên referandûmê ne û di helwesta xwe de zelal in bê derxistin, radestî dadgehê were kirin û ji dadgehê were xwestin ku parlamenteriya wan bê betalkirin.

Di heman daxuyaniyê de hate diyarkirin ku heta dadgeh û qanûn biryara dawî bide, wekîltiya parlamenterên Kurd were rawestandin.