Nobeda 'Azadî ji Ocalan re' ku her hefte Kurdên ji bajarekî Ewropayê dimeşîne, li pêşiya avahiya Konseya Ewropayê ya li Strasbourgê didome. Çalakgerên hefteya derbasbûyî komek ji eyaleta Sachsen a Elmanyayê bûn. Nobedarên vê hefteyê jî komek ji Kurdistaniyên li bajarê Stuttgart ê Elmanyayê ye.

Kawa Kalan, Savaş Butkul, Huseyîn Tekîn û Şivan Rojava wê hefteyekê nobedar bin. Bi navê komê daxuyaniyek bi raya giştî re hate parvekirin û hate gotin, tecrîdkirina Ocalan cihê fikarane. Çalakgeran bal kişandin ser girîngiya Ocalan ji bo Kurdan û destnîşankirin ku çalakiya wan wê heta azadiya Ocalan bidome.

Çalakger der barê jiyan û têkoşîna Ocalan raya giştî agahdar dikin.

Ji komîteya amadekar a çalakiyê Zulfu Bîngol jî bi bîr xist ku Kurd havînê û zivistanê her roj çalakiyê dikin û ev yek jî bandoreke erênî li derdorê dike. Bîngol diyar kir ku çalakger bi broşur û belavokan hewl didin qala Ocalan bikin.