Di çalakiya edaletê de ku wêneyên 34 kesên di qetlîama Roboskiyê de hatin qetilkirin û wêneyê Serokê Baroya Amedê Tahîr Elçî hatin hilgirtin, bal kişandin ku edalet heta mehşerê namîne.

Endamên Komîsyona Heqîqet û Edaletê ya Şaxê Stenbolê ya ÎHD li Qada Galatasarayê kom bûn, di çalakiyê de pankarta wêneyên 34 kesên ku di qetlîama roboskiyê de hatin qetilkirin û “Ji Roboskiyê Re Edalet, Berpirsyar Bên Darezandin” hatî nivîsîn vekirin, daxwaz kirin ku mafê edaletê bên bicih û bên çavdêrîkirin. Osman Ozkan, li ser navê komîsyonê daxuyanî da, bi bîr xist ku bi giştî 34 kesên welatiyên Komara Tirkiyeyê ji aliyê balafirên şer ve hatin bombekirin û qetilkirin, jê 13 zarok in. Ozkan bal kişand ku di 29’ê Gulanê de qetlîama 2’yemîn a Roboskiyê hate kirin û 2 zarok bi bombeyan hatin qetilkirin. Ozkan wiha anî ziman: “Ji bo lenetkirina van qetlîaman, niha bajarên me, kolanên me her roj şahidiyê ji qetilkirina zarok û ciwanan re dikin.” Ozkan wiha pê de çû: “Eger edalet ji bo Roboskiyê pêk bihata, qetlîama Pirsûsê, qetlîama Enqerê û qetlîama Sêwas a 2’yê Tîrmehê pêk nedihat. Seroka TÎHV Şebnem Korûr Fîncancî, Nûnerê Rêxistina Rojnamegerên Sînornenas (RSF) ê Tirkiyeyê Erol Onderoglû û Rojnamevan Ahmet Nesîn nedihatin girtin. Hûrşît Kulter ê ku ev 33 roj in ti agahî jê nayê girtin, li pêş çavên cihanê nedihat windakirin.” Her wiha herî dawî Ozkan ev got: “Edalet ne dozeke ku heta mehşerê bimîne. Li hember qetlîaman, windahiyan, şer, darizandinan bêdeng nabin, li hember kuştinan bêziman namînin.Heta ku lêgerîna edalet û heqîqetê encam bigire, berpirsiyar bên cezakirin wê dewam bike.”