Girseya ku xwest li qada Okmeydani ya Stenbolê 27'ê Mijdarê 34. salvegera damezirandina PKK'ê pîroz bike rastî êrîşa polîsan hat. Di êrîşa polîsan ya bi ava şit û bombeyên gazê de gelek welatî birîndar bûn.

34'emîn salvegera 27'ê Mijdarê roja damezirandina PKK'ê li gelek cihan bi şahiyan hate pîrozkirin. Girseya ku xwest li Parka Sibel Yalçin a qada Okmeydani ya Stenbolê 27'ê Mijdarê 34’mîn salvegera damezirandina PKK'ê pîroz bike rastî êrîşa polîsan hat.

Girseya ku li Parkê kom bûn û rêz girtin, Koma Agirê Jiyan ya NÇM'ê ya konser da û piştî konserê bi sedan polîsên hêzên çevik bêyî ku girseyê hişyar bike bibombeyên gazê êrîş kir. Di êrîşa polîsan ya bi ava şit û bombeyên gazê de zarok, jin û ciwan gelek kes birîndar bûn. Gelek welatiyên ku ji polîsan reviyan ji talûkeyên mezin xilas bûn. Piştî êrîşa polîsan bi panzêr û maşîneyên zirxî park dorpêç kir. Ji ber ku polîsan zêde bombeya gazê bikaranî tax vegeriya qada şer û ewrên gazê çêbûn.