Li bajarê Lozanê çalakiya hevgirtinê ya ji bo Şirnexê hate lidarxistin. Di çalakiyê de wêneyên jinên girtî yên ji bo hevgirtina Şirnexê hatin pêşandan û projeya avahiyan a 1100 xaneyî hate danasîn.

Heyva Sor Swîsre û saziya Bi hev re çalakî li dar xist û gelek sazî û dezgehên Swîsreyî beşdar bûn. Di heman de şahidên zindî yên bodrûmanên wahşetê yên Cizîrê parlementerê Şirnexê Faysal Sariyildiz û Metîn Findik beşdar bûn.

Di çalakiyê de projeya avahiyan a 1100 xaneyî bi slaytê hate danasîn.

FINDIK: QETLÎAMA CIZÎRÊ BI VEGOTINÊ NAQEDE

Metîn Findik ê ku di bodrûmên Cizîrê de şahidê zindî bû got ku, “Heke em çiqasî qala wahşet û hilweşandina Cizîrê bikin jî ew ê têr neke. Me modela Srîlankayê her dem dibihîst. Lê zimanê me nagere ku em qala qetlîamê bikin. Van kesan ji bo me û ji bo rûmeta mirovahiyê li ber xwe dan.”

SARIYILDIZ: LI CIZÎRÊ SÛCÊ MIROVAYETIYÊ HATE KIRIN

Faysal Sariyildiz ê HDP’yî jî got, “Dewleta Tirk li Cizîrê sûcê mirovayetî û şer kiriye. Her kesê ku dibêje ez mirov im, divê li hemberî vê qetlîamê bêdeng nemîne. Ev qetlîam li dijî hemû nirxên mirovayetiyê û rûmeta mirovayetiyê hatiye kirin.”

Piştî pêşandana wêneyan a ku jinên girtî ji bo piştgiriya Şirnexê çêkiribûn, çalakî bi dawî bû.