Di çalakiyan de hat ragihandin, ku Ocalan ji bo gelê Kurd xeta sor e. Çalakgeran, li dijî êrîşên li ser Kerkûkê jî banga berxwedanê kirin.

DÛÎSBÛRG: Kurdistaniyên li bajarê Dûîsbûrg ê Elmanyayê dijîn, danê êvarê li ber stasyona trenê ya navendî li hev civiyan û têkildarî tenduristî û ewlekariya Rêberê Gelê Kurd Abdullah Ocalan kon vedan û mîtîng li dar xistin. Bi sedan kesên beşdarî mîtîngê bûn, bang li saziyên navneteweyî kirin, ku bikevin nava liv û tevgerê.

FRANKFÛRT: Kuristanî û dostên wan, ji bo agahiyeke pê bawer li ser ewlekarî û tenduristiya Ocalan bê bidestxistin, li bajarê Frankfûrtê meşiyan û mîtîngek pêk anîn. Bi qasî hezar kesên hev civiyan, bi qîrîna dirûşma "Nêzîkatiya li Ocalan ji bo me sedema şer û aştiyê ye" heta ber Konsolosxaneya Tirk a li Frankfûrtê meşiyan û piştre li vir mîtîng kirin. Qisekerên li vê derê destnîşan kirin, ku Ocalan ji bo gelê Kurd xeta sor e û divê heta agahî jê bê girtin çalakî bê navber dewamb ikin.

MANNHEÎM: Li bajarekî din ê Elmanyayê Mannheîmê, danê êvarê li ber HBF'ê mîtîngek hate lidarxistin, belavoka bi zimanê Elmanî hate xwendin û bi navê Navenda Civaka Demokratîk a Kurd û meclîsa Jinê ya Ronahî Bêrîvan daxuyanî hate dayin. Bi qasî 500 Kurdistanî û dostên wan tevlî bûn. Wê îro û 21'ê Cotmehê li vê derê meş bên lidarxistin.

HAMBÛRG: Kurdistaniyên li Hambûrgê jî ji ber tirs û fikarên li ser tenduristî û ewlekariya Ocalan meşiyan. Sevahîr Bayindir li vir axivî û anî ziman, ku Ocalan ne tenê Rêberê Kurdan e, ew her wiha lîderê gelên bindest e û dixwazin di dema herî kin de agahiyan li ser tenduristiya wî bigirin.

BERLÎN:  Bi qasî 500 kesên li Brandenbûrger Tor ê Berlînê li hev civiyan, heta Alexander Platzê bi heman armancê meşiyan. Rojan Şemiyê jî wê bi beşdariyeke xurt meş bê lidarxistin.

FREÎBÛRG: Çalakiya li bajarê Freîbûrgê bi beşdariya gelek Kurdistanî û dostên wan pêk hat. Di çalakiyê de ku 3 saetan dewam kir, belavokên li ser mijarê hatin belavkirin û daxuyaniyek hate dayin.

WÛPPERTAL: Kurdistaniyên saet di 17:00 de li Cîty Arkaden a bajarê Wûppertal ê Elmanyayê li hev civiyan, dirûşmên "Bê Serok jiyan nabe", "Bijî Serok Apo" û "Bijî azadiya Kurdistanê" qîriyan. Di daxuyaniyê de hat gotin, "Tenduristiya Ocalan tenduristiya me ye. Heta ku agahî jê bê girtin, em ê çalakiyên xwe bidomînin."

ÛLM: Li bajarê Ûlmê duh li navenda bajêr mîtîngek hate lidarxistin. Di mîtîngê de hikumetên Tirk û Elman hatin rexnekirin û fikarên li ser jiyana Ocalan hatin bilêvkirin.

AMSTERDAM: Li paytexta Hollanda Amsterdamê, zêdeyî sed kes li Centraal Stastîonê li hev civiyan û tecrîda li ser Ocalan şermezar kirin. Her wiha hat ragihandin ku PDK û YNK'ê Kerkûk radestî hêzên mêtinger kirine û ji wan hate xwestin ku dest ji van polîtîkayên xwe yên şaş berdin.

DEN HAAG: Çalakiya li bajarê Den Haag ê Hollandayê jî li ber gara trenê ya navendî pêk hat û ji bo azadiya Ocalan dirûşm hatin qîrîn. 

ATÎNA: Li paytexta Yewnanîstan Atînayê, li meydana Syntagmayê çalakî hate lidarxisitn. Çalakgeran ragihandin ku heta heyet biçin serdana Ocalan wê çalakiyên xwe bidomînin.

STRASBOÛRG: Kurdistanî û dostên wan ên li bajarê Strasboûrg ê Fransayê dijîn, duh êvarê li Place kleberê li hev civiyan û belavok belav kirin. Li vir daxuyaniyek hate dayin û bang li Kurdistaniyan hate kirin ku her roj saet di 19:00 de li Place Kleberê li hev bicivin. Hat ragihandin, ku roja Şemiyê jî wê sat di 13:00 de mîtîngek bê lidarxistin.

TOÛLOÛSE: Têkildarî tenduristî û ewlekariya Ocalan, Kurdistaniyên li bajarê Toûloûse yê Fransayê, li meydana Capîtolê çalakî pêk anîn. Di çalakiyê de bal hat kişandin ser girîngiya tenduristiya Ocalan jib o gelê Kurd û hat gotin, Erdogan û MHP wê cihê xwe li nava sergoyê dîrokê bigirin.

BORDEAÛX: Li bajarê Bordeaûx ê Fransayê, bi pêşengiya tevgera jinan çalakî hate lidarxistin û li ser rewşa Ocalan belavok hatin belavkirin.

MONTPELLÎER: Li bajarekî din ê Fransayê Montpellîerê, Kurdistanî bi heman armancê daketin qadan. Mîtîng li meydana Comedîe hate lidarxistin û hat gotin, "Rêber Apo xeta me ya sor e. Em bi can û mal dilsozê Rêberê xwe ne. Heta agahî ji Rêberê me bê girtin, em ê li ser piyan bin. Em dixwazin parêzer û malbat tavilê Rêberê me bibînin."

MARSÎLYA: Li bajarê Marsîlya yê li Başûrê Fransayê, bi sedan Kurdistanî li meydana Canebîere li hev civiyan û bi qîrîna dirûşma "Bijî Serok Apo" dest bi meşê kirin. Piştî meşê çalakiya rûniştê li dar xistin û daxuyanî dan çapemeniyê. Dûre li meydana Vîeûx Portê mîtîng hate lidarxistin û bang li gelê Kurd hate kirin, ku xwedî li rûmeta xwe derkeve.

DRAGÛÎGNANE: Kurdistaniyên li herêma Dragûînane yê Fransayê dijîn, li Balafirgeha Nîce-Cannesê çalakiya bêîteatiya sivîl pêk anîn û alên PKK, KCK û wêneyên Rêberê Gelê Kurd Abdullah Ocalan vekirin.

Li Marsîlyayê jî, ciwanên Kurd ji şeva Yekşemê û vir ve li gara trenê çalakiya bêîteatiya sivîl pêk tînin.

Li paytext Parîsê jî li ber avahiya qenala televîzyonê ya neteweyî ya Fransayê çalakî hate lidarxistin û bi sedan Kurdistanî tevlî bûn.