Hat ragihandin, komên çete yên qaşo Koalîsyona Sûriyeyê û ENKS'ê îro li Dîlokê civîneke awarte pêk anîne. Di civîna ku rayedarên MÎT û Fermandariya Giştî ya Artêşa Tirk jî lê amade bûn, li ser êrîşên gengaz ên li dijî Rojava tê rawestîn.
Li gorî agahiyên ji çavkaniyên pê ewle hatin bidestxistin, dewleta Tirk banga civîna 'lezgîn' li çeteyên qaşo Koalîsyona Sûriyeyê û ENKS'ê kir. Bi taybetî komên çete yên êrîşî herêma Şehba û Helebê dikin tevlî civînê bûn. Di civîna ku hînê dewam dike de, rayedarên MÎT û Fermandariya Giştî ya Artêşa Tirk jî cih digirin. Hat ragihandin, di civînê de li ser planên êrîşê yên li hemberî Efrîn û herêmên derdora wê tê rawestîn.
Li gorî agahiyan, dewleta Tirk bi tevlîbûna çeteyên qaşo Koalîsyona Sûriyeyê û ENKS'ê, di bin sîwana Ceyş El Sûnanh (Artêşa Sûnî) de êrîşên dagirkirinê bibe ser herêmê.
Hêjayî gotinê ye, beriya çend van komên çete bi desteka dewleta Tirk êrîşî çeperên Ceyş El Siwar û YPG'ê yên li Til Rifat, Eyn Deqne, Bilelon û Minixê kiribûn.
Li ser bersiva şervanên YPG/YPJ û Ceyş El Siwar şerekî dijwar qewimî bû. Çeteyan her wiha bi çekên giran êrîşî çeperên Vîlata Qazî yıa li rojhilatê Efrînê kiribûn.
Ev êrîşên çeteyan hatibûn şikestin û bi dehan çete hatibûn kuştin. Zêdeyî 60 birîndarên van çeteyan derbasî Kîlîsê hatibûn kirin û li nexweşxaneyên li vî bajarî hatibûn dermankirin.
Her wiha tê zanîn, ji ber êrîşa van komên çete yên li hemberî Kîlîsê jî gelek sivîlan jiyana xwe ji dest dan û birîndar bûn.
