Ji bo referandûma di 16'ê Nîsanê de bê kirin, li gelek bajarên Ewropayê kar tê kirin.

NURNBERG

Karê Platforma Na ya li bajarê Nurnberg ê Elmanyayê bi rengekî çalak didome. Di çarçoveya kampanyayê de civînên gel tên lidar xistin, serdana malan tê kirin, mîtîngên 'NA' tên organîzekirin û stant tên danîn. Di vê çarçoveyê de li meydana Plaerer, ku yek ji meydanên herî qelebalix ên bajêr e, stanta agahdarkirinê hat danîn.

Gelek belavok hatin belavkirin û sedema dayîna dengê 'NA' hat vegotin. Stantê gelekî bala Elmanan jî kişand.

KOLN/LEVERKÛSEN

Duh li bajarên Koln û Leverkûsenê, li çar cihên cuda stantên 'NA' hatin vekirin. Li van cihan bi hezaran belavok hatin belavkirin û raya giştî di der barê referandûmê de hat agahdarkirin.

Li Kolnê stanta destpêkê saet di 11:00 de li bazara gel a li taxa Chorweîlerê ji aliyê Navnda Çanda Elewiyan a Chorweîler û Cîhaneke dikare lê bê jiyîn ên ser bi Platforma NA ve hat danîn. 

Saet di 16:00 de jî li sûka bingehîn a li nêzî Dêra Domê stanteke din hat vekirin. Di vê çalakiyê de jî Meclîsa Jinê ya Kolnê raya giştî agahdar kir.

Stanta li taxa Ehrenfeld a Kolnê jî saet di 16:00 de hat vekirin. Li vir jî endamên Navenda Civaka Demokratîk a Kurd, Cîhaneke lê dikare bê jiyîn û AGÎF'ê belavok belav kirin, gel agahdar kirin.

Li bajarê Leverkûsenê jî, bi pêşengiya Platforma NA stant hat vekirin. Stant saet di 12:00 de li navenda bajêr hat danîn û gelek belavok hatin belavkirin.

MANNHEÎM

Li bajarê Mannheîm ê Elmanyayê, Platforma NA stant danî. Li ber HBF'ê bi sedan belavokên ji sê zimanan hatin belavkirin û xwendin.

Li stantê dengê stranên NA bilind bû.

LÎNZ

Li bajarê Lînz ê Awûstûryayê, li ser mijara 'NA' civîneke gel hate lidarxistin. Piştî deqeyeke rêzgirtinê Hevserokê KCDK-E Yuksel Koç axivî destnîşan kir, ku dayîna dengê 'NA' ji bo hemû gelan girîng e û bang li gel kir ku biçe ser sindoqan.

Koç ragihand, xeta rasteqîn a mûxalefetê ya li Tirkiyeyê, projeya HDP'ê ye.

Piştî Koç, parlamenterê berê yê HDP'ê Ozdal Uçer axivî û diyar kir, divê bi ruhê 7'ê Hezîranê ew xwe bi rêxistin bikin û bi ser bikevin.