Desteya Rêveberiya Navendî ya HDP'ê bi wesîleya 4. salvegera Şoreş Rojava daxuyaniyeke nivîskî weşand.

Di daxuyaniyê de hat bibîrxistin, di pêvajoya şerê navxweyî ya li Sûriyeyê de Meclîsa Bajêr a Kobanê, rêveberiya bajêr girt ser xwe û Şoreşa Rojava da destpêkirin.

HDP'ê diyar kir, piştî ku şerê navxweyî yê li Sûriyeyê belav bû, gelê Kurd li şûna şîdetê çareseriyeke bi muzakereyên demokratîk diparast û dema ev daxwaza wan bê bersiv ma, hingî Kurdan, Ereb, Suryanî, Ermenî û Tirkmenan, tevahiya gelên rojava ji bo xwe gav avêtin. 

HDP'ê da zanîn, tevî hemû ambargo, dorpêçî û êrîşan, gelên Rojava xwedî li vîna xwe derketin, ji bo modela jiyana bi hev re ya wekhev û demokratîk a li Sûriye û Rojhilata Navîn ava bikin, têkoşîn mezin kirin.

Di daxuyaniyê de hat gotin, "Veguherîna civakî ya li Rojava, hewldanên gelên li wê derê yên ji bo avakirina siberojeke demokratîk û azad gelekî hêja ye. Ya ku hat kirin, ji bo hemû gelên Rojhilata Navîn û hêzên demokrasiyê destketiyeke girîng û ronahiya hêviyê ye. Rêxistinbûn û têkoşîna Hêzên Sûriyeya Demokratîk, ji bo gelên Sûriyeyê û rejîmeke demokratîk a Sûriyeyê gelekî girîng e."

'DIVÊ GELÊ ROJAVA BI TENÊ NEYÊ HIŞTIN'

Di dawiya daxuyaniya HDP'ê de hat gotin, "Em salvegera çaremîn a Şoreşa Rojava ku di 19'ê Tîrmeha 2012'an de li Kobanê destpê kir û pêl bi pêl belav bû, ji dil silav dikin. Gelê Rojava bi tenê nîne û wê bi tenê neyên hiştin. Sekna bi biryar û têkoşîna di vî warî de; heta ku çeteyên DAIŞ, El Nûsra û yên mîna wan, her wiha destekdarên wan ji Rojava û Sûriyeyê bên derxistin, wê dewam bike."