Parlamentera HDP'ê ya Stenbolê Zuleyha Gulum got, cihêkariya ku desthilatdarî ferz dike û wernegirtina tevdîrên têrker li girtîgehan dikare bibe sedema mirina gelek mirovan.

Parlamenter Gulum ku hiqûqnas e ji ANF'ê re axivî û destnîşan kir, normal diviyabû baro, saziyên mafên mirovan û rêxistinên jinan tevlî amadekirina qanûna navborî ya bicihanîna ceza bihatina kirin. Gulum diyar kir, piştî ku nêrîna civakê hate wergirtin û nêrîna hevpar hate parvekirin diviyabû guhertin bihata kirin û got, "Amadekirina vê pêvajoyê mîna her carê antî demokratîk e. Saziyên ku di vê mijarê de dixebitin ji nedîtî ve hatin û em dibînin ku ji bo girtiyên siyasî ti guhertin nehatiye kirin."

'HIN GIRTÎ HENE KU DEMA WAN A CEZA BI DAWÎ BÛNE, LÊ DÎL TÊN GIRTIN'

Gulum bal kişand ser newekheviya qanûnên bicihanîna ceza yên berê li Tirkiyeyê hatin amadekirin û destnîşan kir, dadgerî ji xwe mîna mekanîzmayeke ji bo bêdengkirina mûxalefeta civakî dixebite. Gulum bi taybetî bal kişand ser cezayên dîsîplînê yên li girtiyên siyasî hatine birîn û got, "Ev ceza bêbingeh in û hiqûq di nav de nîne. Bi rêya van, gelek caran bi hinceta ku şertê berdan bi şert hatiye binpêkirin, ev şert nehate bicihanîn. Berdana bi kontrol nehate kirin."

ENCAMA KÎN Û NEFRETÊ

Parlamentera HDP'ê ya Stenbolê Zuleyha Gulum bi bîr xist ku li girtîgehan ji kapasîteyê zêdetir girtî tên hiştin, zextên kêfî tên kirin, mafên mirovan tên binpêkirin û got, "Bi hezaran girtiyên nexweş hene. Tevî raporên Tipa Edlî nayên berdan û mehkûmî mirinê tên kirin. Tevî van hemûyan, guhertina ku desthilatdariyê kiriye, encama kîn û nefreta li mûxalîfên siyasî ye. Ji bo mafya, çete û tecawizkaran efû tê ragihandin. Bi vî rengî nayê qebûlkirin."