Parlamentera Fransayê Marîe-Chrîstîne Vergîat ji civîna çapemeniyê re malovanî kir û ji Stêrk TV Gulîstan Îke, ji News Channelê Ferda Çetîn û Fusûn Erdogan tevlî bûn.

Nûnerên her du qenalên televîzyonê û parlamentera Ewropî Vergîat nerazîbûn nîşanî hevkariya Eûtelsatê ya bi Tirkiyeyê re dan.

VERGÎAT: DI NAVBERA EÛTELSAT Û TIRKIYEYÊ DE BERJEWENDIYÊN ABORIYÊ HENE

Marîe-Chrîstîne Vergîat diyar kir, ji ber ku ew bi xwe jî Fransayî ye, ev biryara Eûtelsatê wê jî eleqedar dike û bibîr xist, par jî Eûtelsatê bi heman rengî nêzî Newroz TV û Med Nûçeyê bû. Vergîat destnîşan kir, ku Eûtelsat di vê dozê de mehkûm bûbû. 

Vergîat diyar kir, Eûtelsat ji valahiyeke hiqûqî ya li Ewropayê sûdê werdigire û got, "Berjewendiyên gelekî mezin ên Eûtelsatê li Tirkiyeyê hene. Berjewendiyên wê yên aborî derdikeve pêşiya nirxên bingehîn û gerdûnî."

Vergîat işaret bi zextên li Tirkiyeyê kir û anî ziman, çapemenî ti carî li Tirkiyeyê azad nebû, lê piştî hewldana darbeyê ya 15'ê Tîrmehê rewş xerabtir bûye.

ÎKE: HEWL DIDIN DENGÊ GELÊ KURD BIBIRIN

Koordînatora bernameyan a Stêrk TV Gulîstan Îke jî di destpêka axaftina xwe de bal kişand ser zext û zordariya li Tirkiyeyê li çapameniyê tê kirin.

Îke diyar kir, Eûtelsat careke din li ser daxwaza dewleta Tirk dixwaze weşana sê qenalên televîzyonê yên Kurd bigire û li ser weşana Stêrk TV agahî da.

Îke bal bir ser biryara Eûtelsatê ya 14'ê Nîsanê û got, "Em vê hewldanê weke hewldana birîna dengê gelê Kurd dibînin."

ÇETÎN: DIVÊ KONSEY Û PARLAMENTA EWROPAYÊ ZEXTÊ BIKIN

Koordînatorê Giştî yê News Channelê rojnamevan Ferda Çetîn jî li ser lîsansên her sê qenalên televîzyonê agahî da. Çetîn destnîşan kir, ku Îtalya, Swêd û Norwêc, ku lîsansên qenalên televîzyonê li van welatan e, ti gilî û gazinan nakin û got, "Lê belê Eûtelsat xwe dispêre biryara RTUK'ê û dixwaze vê weşanê bibire."

Çetîn bibîr xist, ev biryar biryareke dadgehê nîne û got, "Bi dîtina me, pêwendiya vê biryarê bi lez û beziya rêveberiya Erdogan, bi pêkanînên wan ên li Tirkiyeyê heye."

Ferda Çetîn anî ziman, Eûtelsatê pîvanên azadiya çapemeniyê yên Ewropayê daniye aliyekî û rexne lê kir, ku Eûtelsatê xwe li aliyê RTUK'ê daniye.

Çetîn got, "Têkiliyeke gelekî mezin û kûr a bazirganiyê ya Eûtelsatê bi Tirkiyeyê re heye" û wiha dewam kir: "Em ji Konseya Ewropayê, Parlamenta Ewropayê û saziyên çapemeniyê yên li Fransayê dixwazin ku zextê li Eûtelsatê bikin û ji bo televîzyonên Kurd weşana xwe bidomînin, bikevin nava hewldanan."

ERDOGAN: SOSRET Û CIHÊ ŞERMÊ YE

Ji televîzyona News Channelê Fusûn Erdogan bal kişand ser zextên li Tirkiyeyê li medyayê tên kirin û got, "Erdogan û AKP'ê, çapemeniya li Tirkiyeyê di payîza sala 2016'an de qedand. Mifte li deriyê hemûyan xist û dest danî ser malên wan."

Erdogan diyar kir, RTUK destê xwe dirêjî derveyî sînor dike û sekinandina weşana Newroz TV û Med Nûçeyê bibîr xist. Erdogan destnîşan kir, ku ev yek ji bo Fransa ya ku edalet û azadiya çapemeniyê diparêze, rewşeke sosret û cihê şermê ye.

Fusûn Erdogan bang li kedkarên çapemeniyê û Parlamenta Ewropayê kir û got, "Bi ya me, divê sazî û mirovên alîgirê azadiya çapemeniyê, azadiay îfadeyê û azadiya mafên mirovan, guh bidin dengê me û li cem me cih bigirin."