Der barê hebûna 21 endamên MÎT'ê di nava çeteyên PDK-AKP'ê yên êrîşî Xanesorê kirin de, Parlamentera HDP'ê ya Amedê Feleknas Ûca pêşniyar pirsek pêşkêşî Meclîsê kir.

Ûca ji Wezîrê Karên Hundir ê Tirk Suleyman Soylû xwest bersiva van pirsan bide:

"1- Di êrîşa 3'ê adara 2017'an de, ku li dijî bajarokê Êzidiyan Xanesorê yê Şengalê hat kirin, rast e ku 21 endamên Rêxistina Îstîxbarata Millî (MÎT) di nav de hene? Eger ev îdîa rast be, çend endamên MÎT'ê tevlî vê êrîşê bûne?

2- Ev endamên MÎT'ê yên ku tê îdîakirin tevlî êrîşê bûne, rast e ku endamê koma bi navê Hêzên Zomar e?

3- Di navbera koma çekdar a bi navê Hêzên Zomar û MÎT'ê de têkiliyeke çawa heye?

4- Hêzên Zomar ji kê pêk tên? Rast e ku di nava Hêzên Zomar de endamên MÎT'ê hene?

5- Rast e ku koma çekdar a bi navê Hêzên Zomar ji aliyê Hêzên Çekdar ên Tirk (TSK) û Rêxistina Îstîxbarata Millî (MÎT) ve hatine perwerdekirin?

6- Eger ev îdîa rast bin, Hêzên Zomar kengî û li ku ava bûne? Hêzên Zomar bi kîjan armancê hatine avakirin?

7- Eger rast e ku koma çekdar a bi navê Hêzên Zomar li gundê Eyn El Fîras ê Mûsilê bi cih bûye, wê demê armanca bicihbûna wan çi ye?

8- Kê biryar daye ku koma çekdar a bi navê Hêzên Zomar ku tê gotin 21 endamên MÎT'ê di nav de ne, êrîşî bajarokê Xanesorê yê Şengalê bikin?"