Kurdistaniyên li bajarê Marsîlya yê Fransayê ji bo balê bikişên ser daxwazên çalakgerên greva birçîbûnê, careke din daketin qadan. Girseya li Qada Canebîere li hev civiyan, posterên Leyla Guven û daxwazên çalakvanan rakirin û meşiyan.

Di meşê de jin û zarokan jî posterên Rêberê Gelê Kurd Abdullah Ocalan û alên PKK’ê hilgirtin. Çalakvanan li kolana herî qelebalix a Marsîlyayê çalakiya rûniştinê pêk anîn. Çalakvan, piştî rûniştinê car din bi dirûşmeyên, ‘Leyla Guven ne bi tenê ye’, ‘Bijî serok APO’ meşiyan’. Girseyê, piştî meşa saetekê gihaşt Bendergeha Vieux-Port cihê mîtîngê. Kurdistanî û dostên xwe li vir bi sirûda “Çerxa şoreşê” ji bo bîranîna şehîdên şoreşê rêz girtin û dirûşmeyên “Şehîd namirin” berz kirin.

Hevseroka CDK-F’ê Fevziye Erdemirci li vir axivî û komploya 15’ê Sibatê şermezar kir. Erdemirci, bal kişand li ser çalakiya greva birçîbûnê ya bi pêşengiya Leyla Guven destpê kir û got, "Heke me karibûna xwedî li Serokê xwe derkevin û tecrîd şkênandibûya, wê îro ev çalakiyên greva birçîbûnê ya Leyla Guven pêşengiya wê dike, destpê nekiribûna. Ev çalakî ji bo me jî weke rexnedayînekê ye. Ji niha û pêde tişta ku dikeve ser milê me ew e ku em hevalên xwe bi tenê nehêlin û bibin dengê wan, bi awayekî xurt xwedî li daxwazên wan derkevin."

Kemal Guler ê li ser navê Navenda Civaka Demokratîk axivî jî peyama çalakgerên Strasbourgê parve kir û got, “Ez dixwazim heval hemû wê hêza xurt a vîn û baweriya wan bibînin. Rast e, hevalê Yuksel Koç pirsgirêkên tendirûstî û fîzîkî dijî lê belê moralê wî gelek bilind bû. Hevalên çalakvan, çalakiya xwe weke rexnedana li ber şehîdên pêvajoya Konfederalîzma Demokrarîk dinirxînin û li ber çavên me bang li me dikin.”

Siyasetmedarê Kurd Xebat Ocalan jî çalakvanên greva birçîbûnê silav kirin û got, “Em ê li her bajarî, li her derê wan biparêzin. Gelê me li ku derê be bila bibe divê xwedî li wan derkeve û çalakiyê mezin bike.”