Dayikên Şemiyê ji bo aqûbeta xizmên xwe yên di bin çavan de hatine qetilkirin yan jî windakirin bipirsin, her hefteyê li Qada Galatasarayê ya Stenbolê tên ba hev. Dayikan di hefteya 1045’an a çalakiya xwe de, aqûbeta Talat Turkoglû yê ku 1’ê Nîsana 1996’an li Stenbolê hat binçavkirin û piştre hate windakirin, pirsîn û xwestin ku faîl bên darizandin. Di çalakiyê de qurnefîl û wêneyên kesên di bin çavan de hatine windakirin, hatin hildan. Hevseroka Şaxa Komeleya Mafên Mirovan (ÎHD) Gulseren Yolerî daxuyaniya çapemeniyê xwend.

‘JI BER DERBASBÛNA DEM, DOSYA HATE GIRTIN’

Gulseren Yolerî çîroka Talat Turkoglû xwend û got, “Turkoglû 1’ê Nîsana 1996’an ji bo vegere mala xwe ya li Stenbolê bi rê ket, lê piştre êdî agahî jê nehat girtin. Hemû hewldanên Malbata Turkoglû, Komeleya Mafên Mirovan û Rêxistina Efûyê ya Navneteweyî bê encam man. Rayedarên fermî gotin, Talat Turkoglû nehate binçavkirin û ew nizanin li kuderê ye.” Gulseren Yolerî îfadeyên îtîrafkar bi bîr xist û got, dosya ji ber derbasbûna dem hatiye girtin.

‘TÊKOŞÎNA ME WÊ BIDOME’

Gulseren Yolerî bang li Serokkomar Erdogan kir û got, “Muxatabê pirsa ‘gelo çi bi serê xizmên me yên hatin binçavkirin hat?’ 23 sal in hûn û desthilatdariya we ne.”

Piştre xwişka Talat Turkoglû, Munube Turkoglû jî mafê axaftinê girt û diyar kir ku ji bo darizandina berpirsyaran ew ê têkoşînê bidomînin.