Balefirên şer ên dewleta Tirk li gundê Roboskî yê Qilebana Şirnexê di sala 2011’an de 17 jê zarok bombe li ser 34 kesan barandibû. Di salvegera 9’emîn a Qetlîama Roboskiyê de DBP, Partiya Azadî û Baroya Amedê daxuyaniyên nivîskî weşandin.

DBP: DIVÊ CEZA LI BERPIRSYARAN WERE BIRÎN

DBP’ê di daxuyaniya xwe de diyar kir ku qetlîama Şêx Seîd, Qoçgirî û Dêrsim û kuştinên di salên 1990’î de yên li dijî Kurdan polîtîkaya fermî ya dewletê ye got, “Bi polîtîkaya cezanekirinê ev qetlîam zêde dibin. 9 sal berê jî 34 ciwanên Kurd bi balefiran hatin qetilkirin û doza wê hate girtin. Di serî de qetlîama Roboskiyê divê hesabê qetlîamên li ser gelan were pirsîn û ceza li berpirsyaran were birîn.”

PARTIYA AZADÎ: EM Ê QETLÎAMA ROBOSKIYÊ JI BÎR NEKIN

Partiya Azadî jî diyar kir ku Qetlîama Roboskiyê ne qetlîameke ji rêzê ye û got, “Em ê Roboskiyê ji bîr nekin û nedin jibîrkirin. Di salvegera 9’emîn de em şehîdên Roboskiyê bi hurmet bi bîr tînin.”

BAROYA AMEDÊ: BILA DOSYE DÎSA WERE VEKIRIN

Baroya Amedê jî diyar kir ku di Qetlîama Roboskiyê de tu peywirdarên dewletê nehatine darizandin û got, “Kujer ji aliyê burokrasiyê tên parastin û ji ber vê jî nayê xwestin ku rastî derkeve holê. Em dixwazin ku dosyeya lêpirsînê ya vê qetlîamê ji nû ve were vekirin, kujer û berpirsyar werin darizandin û dev ji polîtîkaya cezanebirînê were berdan.”