Ciwanên Kurd li ser banga Ciwanên Azad û Jinên Ciwan ên Azad daketin kolanan û li dijî wehşeta AKP'ê meşiyan. Ciwan duh êvarê li Navenda Çanda Kurd a Ahmet Kaya li hev civiyan û bi qîrîna dirûşmên "Bijî berxwedana Nisêbînê", "Bijî berxwedana YPS/YPS Jinê", "Kujer AKP, terorîst Tirkiye" meşiyan.

Ciwanan di çalakiyê de posterên Rêberê Gelê Kurd Abdullah ocalan, alên PKK û Ciwanên Azad hilgirtin û heta meydana Repûblîqûe meşiyan. Di axaftinên li qada mîtîngê de hat gotin, "Çawa ku Kobanê û Şengal ji çeteyên DAIŞ'ê hatin paqijkirin, Nisêbîn û Şirnex jî wê ji çeteyên AKP'ê bên paqijkirin." Ciwanan bang li her kesî kirin ku xwedî li berxwedana xwerêveberiyê derkevin û destnîşankirin, ku ev hovîtî wê were şikandin.

Piştî mîtîngê ciwanan berê xwe dan Kûleya Eîfelê û çalakiya we li vir dewam kirin. Ciwanan li ber Kûleya Eîfelê belavokên li ser Nisêbînê û xwerêveberiyê belavkirin û dirûşme qîriyan. Polîsên Fransayê dest li çalakiyê werdan û kesek binçavkirin. Di navbera polîsên tedbîrên tund ên ewlekariyê girtin û ciwanan de nîqaşên tund derket. Polîsên Fransayê yên nikarîbû vîna ciwanan bişikînin, piştî demekê xwe vekişandin.

Komek ji ciwanan dûre posterê Ocalan li Kûleya Eîfel daliqandin û belavok belav kirin. Ciwan piştre dîsa meşiyan û bi qîrîna dirûşmeyan dawî li çalakiya xwe anîn.