Derbarê nûçegihanê Ajansa Nûçeyan a Dîcleyê (DIHA) ya ku di 29'ê Cotmeha 2016'an de ku bi KHK'yê hat girtin û karkerê yekeya çapemeniyê yê Şaredariya Kerboranê ya Mêrdînê Mûrat Verîm de, bi îdîaya "propagandaya rêxistinê" doz hatibû vekirin û biryara HAGB'ê hatibû dayîn.

Piştî ku di sala 2019'an de li Dadgeha Cezayê Giran a 3'emîn a Mêrdînê biryara HAGB'ê hat dayîn, dîsa heman parvekirina medyaya dijîtal wek hincet hat nîşandan û li Dadgeha Cezayê Giran a Midyadê dozeke nû hat vekirin û 3 sal cezayê girtîgehê lê hat birîn.

Piştî biryara Dadgeha Cezayê Giran a Midyadê "giliyek" wek hincet hat nîşandan û derbarê Mûrat Verîm de li Dadgeha Cezayê Giran a 2'yemîn a Yozgatê dozeke din hat vekirin. Tevî ku Dadgeha Cezayê Giran a 2'yemîn a Yozgatê tespît kir ku ev doz mukerrer e, ji ber parvekirina "Bijî Berxwedana Kobanê" ya ku tê de wêneyên YPG'yîyan jî hebû, biryar dan ku cezayê lê hatiye birîn kêm e û 4 sal 6 meh cezayê girtîgehê lê hat birîn. Ji ber heman parvekirinê cara sêyem cezayê girtîgehê li Mûrat Verîm hat birîn û piştî hesab kirina cezayên berê, dadgehê 3 meh din ceza dayê.

Di vê navberê de derbarê Verîm de, li Dadgeha Cezayê Asliye Îpsalayê jî bi hinceta "derbasbûna ji sînorî" dozeke nû hat vekirin û dadgehê derbarê wî de biryara bêparhiştina hin mafan da. Piştî teqezbûna biryarê, cezayê wî yê salan jî hat erêkirin û 16'ê Îlonê hat girtin û xistin Girtîgeha Ewlehiya Bilind a H Tîpî ya Erziromê. Her wiha li Dadgeha Cezayê Giran a 3'emîn a Mêrdînê jî ji bo biryardayîna HAGB'ê jî doz hat vekirin. Di danişîna îro ya dozê de 1 sal û 3 meh cezayê girtîgehê li Verîm hat birîn.