'AKP wê nikaribe Kurdan bitirsîne'
Umît Dede yê HDP'î nerazîbûn nîşanî êrişên AKP'ê yên li dijî goristanan û cenazeyan da û got, "AKP hewl dide bi tirsê civakê teslîm bigire. Lê belê gelê Kurd wê ti carî teslîmî polîtîkaya tirsê ya AKP'ê nebe."
Umît Dede yê HDP'î nerazîbûn nîşanî êrişên AKP'ê yên li dijî goristanan û cenazeyan da û got, "AKP hewl dide bi tirsê civakê teslîm bigire. Lê belê gelê Kurd wê ti carî teslîmî polîtîkaya tirsê ya AKP'ê nebe."
Alîkarê Hevserokên HDP'ê yê ji Hiqûqê û Mafên Mirovan Berpirsyar Umît Dede êrişên desthilatdariyê yên dema dawî nirxand.
Umît Dede destnîşan kir ku desthilatdariyê di vê pêvajoya şewba Covîd-19 de hem li girtîgehan hem jî li derve hiqûqa dijminatiyê pêk aniye.
Umît Dede bibîr xist ku hejmara girtiyan û personelên girtîgehê yên bi vîrûsê dikevin roj bi roj zêde dibe û got, "Hikumetê bi guhertina ku di qanûna înfaza ceza de kir di serî de girtiyên siyasî, girtiyên di nava yên bi rîsk de ne, terikî mirinê kiriye.
Hikumet şewba Covîd-19 weke rêbazeke cezakirinê bi kar tîne. Mînaka dawî ya vê yekê jî Sabrî Kaya ye ku rojek piştî berdana ji Girtîgeha Osmaniyeyê jiyana xwe ji dest da. Kaya tevî ku 2 caran emeliyata vekirî a dil lê hate kirin û 20 caran krîza dil derbas kir, tevî hewldanên rêxistinên mafên mirovan nehate berdan."
Umît Dede destnîşan kir ku mirina Sabrî Kaya û êşa ku bi malbata wî dan kişandin, nêzîkatiya hikumetê ya li girtiyên siyasî nîşan dide.
Umît Dede bal kişand ser êrişên li dijî goristanan û cenazeyan û got, "AKP bi vî rengî nîşanî tevahiya civakê dide ku dikare çiqasî çavsor bibe, çiqasî hov bibe. AKP bi vê kiryara xwe ya hovane ya li dijî cenazeyan û goristanan hewl dide civakê bitirsîne û teslîm bigire. Lê belê divê bê zanîn ku gelê Kurd wê ti carî teslîmî van polîtîkayên tirsandinê nebe. Ev hovîtî wê weke rûreşiyekê di dîroka Komara Tirkiyeyê û dîroka AKP'ê de bê bîranîn. Gel wê ti carî dest ji xwedîderketina li rûmeta xwe bernedin."