Bi ruhê berxwedana 14’ê Tîrmehê, li çiyayên Kurdistanê cenga rûmeta netewî tê koordînekirin. Berxwedêrên 14’ê Tîrmehê bedenên pîroz kirin şemal, pê re perdeya zilmê parçe kirin û xaçerêka jiyana azad bi roniya canên bedew xemilandin.

Gerîlayên Azadiya Kurdistanê bi terzê lêdan û çalakiyên xwe, 42 sal in vî ruhî diparêzin û geş dikin. Îsal jî hêzên gerîla ji bo bîranîna giyanê afrînerên xeta berxwedana Apoyî, di qada hewayî de rêzeçalakiyên serketî li dar xistin. Agirê “Berxwedan jiyan e” li hewayê geş kirin û bi sotîneriya wê, leşkerên dagirker di baragehên wan de ceza kirin.   

GERÎLA BI TEKNÎKA TAYBET LI DAGIRKERAN DIDE

Hêzên hewayî yên Yekîneya Şehîd Dogan Zinar, ji 3’yê heta 11’ê Tîrmehê, li qadên Sergelê, Girê Bahar û Amêdiyê baragehên artêşa Tirk ji hewayê de dixin bin kontrola xwe û 7 çalakiyên serkeftî li dar xistin. Bi 5 kuştî û 8 birîndarên artêşa Tirk re 2 wesayîtên zirxî yên tîpa Kîrpî hatin îmhakirin û zirareke mezin dane baregehên dagirkeran.

Ji ber ku dagirkeriya Tirk potansiyela artêşa li hemberî xwe nasnekiriye, nekariye çavkaniya performansa wan fêm bike. Lewre her carê binketineke mezintir dijî.

Di pêşxistina taktîkên şerê gerîlayên azadiyê de du xalên rêgezî hene:

1-  Ji dubarê û hînbûnên klasik direve.

2-  Nûbûn, afrîneriya domdar û guhertina nerm di taktîkên xwe de esas digire.

Lewra hinek xalê esasên ku pêwîste ji tarzê şerê gerîla û yê bi dagirkeriyê re were fêm kirin hene. Hêzên HPG û YJA Starê tecrûbeyên xwe yên di şer de bi berdêl û kedeke mezin qezenc dikin. Lewra bi qasî keda ku tê dayîn ew bi hesasî, berfirehî û kûr li ser van ezmûnan disekinin. Bi çavekî rexnegirî analîz dikin, bi tesbîtên nû diçin biryar û alternatîfên pisporane, li hemberî her cureyê êrîşên dagirkeriya Tirk rêbazê bersiv dayîneke dijwar û encamgir dertînin holê.

Ji xwe yek ji taybetmendiya herî bingehîn ên Partiya Karkerên Kurdistanê ew e ku di bin her şer û mercên giran de dizane derçûnên herî bi wate û tolgir saz bike. Bê guman ev taybetmendî jî, di serî de di derketina Rêber Apo de, dûvre jî di ruhê berxwedêr yê zindana Amedê de dibîne. Bi taybetî di şerê van çar salên dawiyê de, hêzên gerîla ev yek kiriye bingeha tekoşîna xwe û li ser hîmê wê serketinên mezin bi dest dixe. Tevî her cureyên teknolojiya serdemê ya li ku hemberî wan tê şûxilandin, tevî her cureyê çekên qedexekirî yên ku artêşa mezintirîn nikare ewqas xwe li ber ragire, gerîla di pêşxistina taktîk û teknîka şerê xwe de lawazî nejiya. Karî rêbazên hîn bi bandor îcad bike û asta şerê xwe bigihîne pileyeke pir girîng. 

ARTÊŞA TIRK A DAGIRKER XWE Û GELÊ TIRK DIXAPÎNE

Dewleta Tirk a dagirker ji ber ku bazirganiya qirkerî û faşîzmê dike, ji bo wê mirina bi hezaran leşkerên wê ne xem e. Partiya Karkerên Kurdistanê li hemberî artêşa Tirk şer dike û wendahiyan mezin pê dide jiyîn. Lê artêşa Tirk her tim bikaranîna amûrên şerê taybet, bi rêya medyaya derewîn, di serî de xwe dixapîne, dûvre jî gelê Tirk ên ku li ber zilm û zordariya Erdogan bûne gelê herî perişan yên vê dinyayê û haya wan ji wan tine ye.

Her dem artêşa Tirk wendahiyên ku Tevgera Azadiyê pê daye kirin, an bi temamî veşartiye, an jî ji deh leşkeran navê 3 an 5’an dide. Ew jî dîsa ji ber gerîla nasnameyên kuştiyan eşkere dike neçar dimînin ku navê kuştiyên xwe bibêjin.

GERÎLA BI ZIMANÊ KU DAGIRKER FÊM DIKIN LI WAN DIDE

Dewleta Tirk ji ber ku her xwe di çavê gelê Tirk û cîhanê de mezin kiriye û xwe xistiye şûna xwedayê şer de, bi ti awayî nikare li binketina xwe ya li hember nûjeniya çalakgeriya gerîla mikur were, an jî herî kêm kuştiyên ku di çalakiyên hewayî de têne kirin ragihîne.  Da ku performansa bilind, profesyonelî û pêşketinên di şerê gerîla de neyê dîtin. Bi awayekî ser girtî cenazeyê bi sedan leşkeran vedişêre. Lê weke her demê gerîla dizane çawa kirayarên kirêt ên artêşa Tirk derîne holê û bi zimanê ku ew fêm dikin bi wan re şer bike. Hêzên profesyonel ên gerîla dema starta çalakiya xwe didin, tiliyekê datîne ser tetîkê, tiliya din jî datîne ser tuşa REC û bi kamerayan dîmenên binketina artêşa Tirk dikşînin. Çalakiyên xwe bi dîmenan tomar dikin û bi belge dikin. Bi weşandina dîmenan rastiya şer radixin ber çavan.

Ya girîng ew e ku raya giştî ya Tirk rastiya van dîmenan bibîne û têkeve nava lêpirsînê.