Temellî tevî endamên Desteya Rêveberiya Navendî ya HDP'ê Omer Onen û Bedriye Yorgûn, parlamenter Nîmetûllah Erdogmûş û Feleknas Ûca, endamên Meclîsa Jinan û Meclîsa Partiyê serdana rêxistina HDP'ê ya bajêr kir.

Temellî bi bîr xist ku desthilatdariya heyî bi îdîaya "ez demokrat im, ez ê meseleya Kurd çareser bikim" bû desthilat û got, "Lê belê ji hemû desthilatdariyên beriya xwe bêhtir dijminatiyê li Kurdan dike. Weşan û saziyên Kurdî qedexe kir, wekîltiya parlamenterên Kurdan betal kir û nikare xwe li peyva bajarê Kurdan jî rabigire."

EFRÎN A EFRÎNIYAN E, JI WIR DERKEVIN!

Sezaî Temellî da xuyakirin ku ji 7'ê Hezîranê ve polîtîkaya şer li ser Tirkiyeyê tê ferzkirin û got, "Destpêkê êrîşî bajarên Kurdan kirin. Bi hezaran mirov mexdûr kirin. Gelek mirovan jiyana xwe ji dest dan. Qîma xwe bi vê yekên eanîn. Ne tenê li hundir, li Efrînê jî heman tişt kirin. Tevî çeteyên ji ber DAÎŞ'ê mane dest bi talankirina Efrînê kirin. Efrîn a Efrîniyan e, derkevin ji wê derê."

DI 25'Ê HEZÎRANÊ DE EM Ê VÊ DESTHILATDARIYÊ BIQEWIRÎNIN!

Temellî destnîşan kir ku roja 25'ê Hezîranê wê desthilatdariya bûye belayê serê welêt biqewirînin û bi dewamî got, "Polîtîkaya şer ku bi dijminatiya li Kurdan dimeşînin, li Sûriyeyê jî didomînin. Tê bîra we; hewl dan heman tiştî li Kobanê jî bikin. Gelê Kobanê li ber xwe da. Îro jî gelê Efrînê li ber xwe dide û wê van talankeran ji Efrînê biqewirîne. Em ê jî vê desthilatdariya ku bûye belayê serê welêt roja 25'ê Hezîranê biqewirînin."

Temellî hişyariyên xwe bi bîr xist ku beriya niha gotibûn, 'eger meseleya Kurd çareser nebe, wê her tişt birize' û got, "Weke HDP, KCD û HDK'ê me got; eger hûn meseleya Kurd çareser nekin, ev yek wê bibe sedem ku her tişt birize. Wê rê li ber pirsgirêka demokrasiyê veke. Li vî welatî eger pirsgirêka demokrasiyê çareser nebe, meseleya Kurd jî çareser nabe. Em pê bawer in ku bi têkoşîna demokrasiyê, di serî de meseleya Kurd em ê hemû pirsgirêkan çareser bikin."

FIRSENDEK LI BER ME YE

Hevserokê Giştî yê HDP'ê Temellî got, "Niha firsendek derketiye pêş me" û wiha dewam kir: "Bi geşkirina vê têkoşînê re derfetên rizgarkirina ji vê desthilatdariyê dikarin bên afirandin. Werin em bi hev re têkoşînê geş bikin û ji vê Qesrê, ji vê feraseta tekparêz rizgar bibin."

Temellî bi bîr xist ku yekane rêya rizgariya ji zilma AKP'ê têkoşîn e û got, "Yên ku herî zêde bi vê rastiyê zanin, mirovên li vê erdnîgariyê ne. Dem hatiye ku êdî em dawî li vê yekê bînin."

JÊ HEYE KU WÊ BI SER BIKEVE

Temellî got, "Di nava panîkê de biryara hilbijartinê da. Jê heye ku wê bi ser bikeve" û wiha dewam kir: "Tu yê bi ser nekeve. Roja 24'ê Hezîranê em ê te ji vir bibin. Em ê dawî li vê zilmê bînin."

Temellî diyar kir ku wê bi namzetê xwe tevlî hilbijartinê bibin û got, "Namzetê me namzetê Tirkiyeyê, namzetê jiyana nû, paşerojê, hêvî û têkoşîna demokrasiyê ye."

Bi dewamî Temellî got, "Bala xwe bidinê; li her derê li namzetan digerin, dikin nakin nabînin. Bazarî, danûstandinan bêyî HDP'ê dikin. Bêyî me nabe. Em çareserî ne. Hûn bi nedîtina me re xwe dişibînin Qesrê. Her kes wê qebûl bikin ku bi me re siyasetê bikin. Bi dijminatiya li me re hûn nikarin pêşî li welêt vekin. Werin em li dora namzetê Tirkiyeyê, namzetê hêzên ked û demokrasiyê, namzetê têkoşîna gelan bicivin. Bi vî rengî em bi hev re pêşî li Tirkiyeyê vekin."

DI TÛRA DESTPÊKÊ DE JÎ EM Ê BI SER BIKEVIN

Temellî got, "Ji me dipirsin; 'Wê di tûra duyemîn de çi bibe?' Di tûra yekemîn de çi bibe, wê di tûra duyemîn de jî ew bibe. Di tûra yekemîn de em ê bi ser bikevin, di tûra duyemîn de jî. Ti carî dev ji vê hêviyê bernedin. Çi dibêjin bila bêjin, guhertina vî welatî di destê me de ye. Her ku em bimeşin wê pêşî li demokrasî û azadiyê vebe.

Em ê têkoşînê geş bikin. Kî ji rêya xwe vedigere bila vegere, em ji rêya xwe venagerin."